SIKHUZA IHLAZO LASE-NATURENA ISITOBHA SE-CHIEFS
UKHUZA ihlazo umdlali weKaizer Chiefs ezobhekana neChippa United kowe-Absa Premiership ngoLwesithathu ngo-19h30 eNelson Mandela Bay Stadium, eBhayi.
Lo mdlalo ungomunye webhekwe kakhulu phakathi nesonto. Isizathu salokho wukuthi kubhekene abaqeqeshi abangabangani futhi abanomlando ebholeni lakuleli, uSteve “Mphathi” Komphela weChiefs noTebogo “Tebza” Moloi weChippa.
Nokho iChippa yiyona eyizimfivilithi ukunqoba lo mdlalo njengoba ishaya kwasani ngaphansi kukaMoloi, kanti ezikaKomphela zidonsa kanzima njengoba emidlalweni eyisihlanu yeligi zisanqobe owodwa.
UDaniel Cardoso ( osesithombeni) odlala emuva kwiChiefs, ukhuza ihlazo abalenzayo benabalingani bakhe, athi lizophinda libafake enkingeni yokunganqobi nkomishi nangale sizini.
“Into esilimaze ngesizini edlule wukugijima imidlalo eminingi ngokulingana okwenze salahlekelwa yinqwaba yamaphuzu.
"Besidlala ngokulingana ngisho emidlalweni obekufanele siyinqobe kalula. Nangale sizini siphinda into efanayo, siyafa wukudlala ngokulingana ngisho kungenasidingo. Empeleni iyihlazo le nto kufanele siyiyeke. Yisikhathi manje lesi sokuthi siqale siqoqe amaphuzu agcwele, sesimoshe kakhulu,” kusho uCardoso.
Uthi iChippa ngeke ibe lula neze.
“IChippa akuyona ikilabhu ongavele uyihlomekele nje, kuzofanele siyigade ngoba iyingozi. Selokhu kufike uMoloi idlala ibhola eliseqophelweni eliphezulu futhi elinenhloso hhayi leli ebilidlala phambilini. Nakuba kunjalo kufanele siwunqobe lo mdlalo,” kusho uCardoso.
USandile Zuke odlala esiswini kwiChippa oke wadlala kwiChiefs phambilini, okubhekwe ashaye ibuya njengoba ubelimele, uthi abanalo uvalo ngeChiefs.
“Ukungabi kwayo sefomini akusho ukuthi kufanele siyithathe kancane ngoba lokho kungaba yingozi. Kuzofanele siyinike indawo yayo kodwa bese sikuqinisekisa ukuthi siyawunqoba umdlalo. Kasinalo uvalo ngayo izosifica siyihlomele nxa zonke,” kusho uZuke.