SEKULELE KUMQEQESHI WOSUTHU NGOKAPUTENI
SEKULELE kuCavin Johnson ongumqeqeshi wamaZulu FC ukubophela uTapelo Nyongo ongukaputeni wale kilabhu oseqalile ukujima ngokugcwele kwiNyokan’ Eluhlazana.
USuthu luzodudulana neBloemfontein Celtic koweAbsa Premiership ngoLwesithathu ngo-19h30 eKing Zwelithini Stadium, eMlazi. ICeltic izogijima lo mdlalo isazikhotha amanxeba emuva kokuthelwa induku yiBidvest Wits kuba ngu-1-0 kowamanqamu weTelkom Knockout ngoMgqibelo ebusuku KwaMashu.
UBrilliant Mkhathini oyisikhulu sezokuxhumana oSuthwini, utshele ILANGA ukuthi konke sekulele kuJohnson ngokuqala ukubonakala ensimini kukaNyongo olimale le kilabhu ibhekene nePlatinum Stars maphakathi noMandulo (September) eMlazi. Uqhube ngokuthi bazogijima lo mdlalo ngaphandle kukaPhumlani “Wele” Gumede othole ikhadi elibomvu uSuthu lubhekene neKaizer Chiefs, kanti u-Augustine Ramphele usalimele. URhulani Manzini ongumgadli woSuthu, uthi bazimisele ngokufaka usawoti enxebeni elibhibhayo leCeltic ngokwenza muncu uhambo lwaseThekwini lwale kilabhu yaseFree State.
“Siwubheke ngabomvu lo mdlalo njengoba iCeltic idlala ibhola elifana nelethu elihlaselayo. Nokho sinalo iqhinga esilitshelwe wumqeqeshi ukuyiqumba phansi kulo mdlalo. Okuhle wukuthi irekhodi lethu lihle kakhulu emidlalweni yasekhaya.
“Kasizimisele ukuphoxa abalandeli bethu abasifaka olukhulu ugqozi ekhaya. Kumele baqhubeke nokuza ngobuningi emidlalweni yethu,” kusho lo mgadli obuye ayibambe noMabhudi “Lion” Khenyeza phambili ohlohlele uSuthu igoli elimqoka lubambana ne-Ajax Cape Town ngo-2-2 kowakamuva ekuhambeni.
Isiyonke imidlalo ye-Absa Premiership ehlelelwe ukugijinywa phakathi nesonto imi kanje:KUSASA NGOLWESIBILI EPrincess Magogo: Cape Town City FC vs Maritzburg United 19h30.
ELucas Moripe: Mamelodi Sundowns vs Baroka FC 19h30.
E-Orlando: Orlando Pirates vs SuperSport United 19h30 (SS4). NGOLWESITHATHU EGoble Park: Free State Stars vs Golden Arrows 18h00.
EKing Zwelithini: Celtic 19h30.
ENelson Mandela Bay: Chiefs 19h30 (SS4).
E-Old Peter Mokaba: Stars 19h30.
EBidvest: Bidvest Wits vs Ajax Cape Town 19h30. AmaZulu FC vs Bloemfontein Chippa United vs Kaizer Polokwane City vs Platinum