Akayizwa eyekhwelo likaMnu Zuma
Uthi lesi sinqumo sizodala ubumbano
UMNU Cyril Ramaphosa oyisekela-mengameli leAfrican National Congress (ANC) neNingizimu Afrika, uyikhahlela ngazo zombili eyesicelo sikaMengameli Jacob Zuma yokuthi ozophuma isibili engqungqutheleni yokukhetha ubuholi obusha be-ANC uzoba yisekela lonqobile ukuze kudaleke ubumbano kuleli qembu.
Le ngqungquthela kulindeleke ukuba iqale ngoMgqibelo ize iphele zingama-20 kwephezulu eNasrec, eGoli. Yize kuzovota izithunywa kodwa ngokwezibalo zamagatsha, uMnu Ramaphosa uhamba phambili alandelwe nguDkt Nkosazana Dlamini-Zuma kubaholi abangaphezu kwabayisihlanu abagaqele lesi sikhundla.
Phakathi kwabo kubalwa uDkt Zweli Mkhize, uMnu Jeff Radebe, noNkz Lindiwe Sisulu. Ekhuluma neCity Press okuyiphephandaba lesiNgisi eliphuma kanye ngeSonto, uMnu Ramaphosa uthe uMengameli Zuma ubemane ebeka umbono ngale nkulumo yakhe ayenze ngesikhathi kunengqungquthela yemigomo yeANC, kodwa lokho kakungasho ukuthi amalunga e-ANC ayawe- mukela. “Kube nomuzwa wokuthi lolu daba luzodluliselwa emagatsheni bese kuba yiwona ashoyo ukuthi ayavuma yini noma cha.
"Kuyinto eyaziwayo ukuthi kwiANC izinqumo kasivele nje sizithathe amagatsha engashongo lutho, kodwa siyaye siyekele anqume," kusho uMnu Ramaphosa. Ukubeke kwacaca ukuthi yibona abasembangweni wezikhundla okumele bakhulume nabantu ukuba baziphathe ngendlela eyamukelekile enqgungqutheleni, kube nobunye.
“Thina njengabantu abasembangweni, sizibophezele ukukhankasa ngendlela engeke yangcolisa igama le-ANC. Akekho kithina ofisa kube nodlame phakathi kwamalunga ethu ngesikhathi kukhankaswa noma sekusengqungqutheleni.
"Savumelana, akekho ozovunyelwa ukucula amacula azogxibha abanye," kusho uMnu Ramaphosa. Ngakolunye uhlangothi, kunamahlebezi okuthi kunezithunywa ezihlela ukuyinyomfa ingqungquthela. Ephawula ngalokhu uMnu Ramaphosa, uthe akakholwa ukuthi kungaba nabantu abagula ngale ndlela yokuthi bangafisa ukunyomfa ingqungquthela enhle kangaka.
"Kangikholwa ukuthi kunomuntu ophilile kahle ekhanda ongafisa ukuchayisa abantu abayisigidi abangamalunga e-ANC nabali-10 million abayesekayo, abancishe ithuba elinjengaleli lokuba i-ANC ibumbane futhi izakhe kabusha.
"Uma kungase kwenzeke lokho, kungaba kuwucekela phansi umlando nomsebenzi wamaqhawe e-ANC asebenze kanzima eyakha," kusho uMnu Ramaphosa. NgokweCity Press, sekunemizamo yokuba babekwe etafuleni uMnu Ramaphosa noDkt Dlamini-Zuma ukuze baxoxe kube khona owehlela ngezansi ukuze izinto zihambe ngendlela.
USihlalo we-ANC KwaZuluNatal, uMnu Sihle Zikalala, ucashunwe eyigcizelela eyesidingo sokuba kube khona ozokwehlela ngezansi yize-ke iqembu lakhe lithe kakumele yonke into ibe ngoMnu Ramaphosa kule ngqungquthela naye kumele emukele okunye ukuze izinto zibe ngendlela.