Izothunwa ngebhokisi elihlukile inkosi
Ngeke lihlakazwe njengoba lakhiwe ngendwangu
KUZOQOPHEKA umlando kutshalwa iNkosi yaKwaMthethwa KwaMbonambi, enyakathompumalanga yeKwaZulu-Natal ekhothame ngeledlule.
INkosi Ntemba Mthethwa (93), ikhothame ngoLwesithathu emuva kokugula isikhathi eside, izotshalwa ngeSonto kwaBhekwayinkosi. ILANGA lithole ukuthi ngelanga ezothunwa ngalo inkosi, kuzoqopheka umlando njengoba izofihlwa ngebhokisi elakhelwe ukuba lingabulawa uma sekufikwa emathuneni.
Leli bhokisi kuthiwa lizosiza kakhulu abantu abangangcwabi ngamabhokisi epulangwe - ngenxa yezinkolelo eziningi. ILANGA selingakuveza ukuthi leli bhokisi lizosiza kakhulu amalunga ebandla lamaNazaretha ngoba lona kuyaziwa ukuthi lawa ajwayelekile kaliwasebenzisi ukungcwaba, umuntu uthwalwa ngalo kodwa uma sekufikwa emalibeni, liphihlizwe.
Nabantu nje abakholelwa esintwini kubukeka lizobalisa. UDkt Bhekisisa "BV" Mthethwa, ongesinye sezakhamizi eziqavile ngaphansi kombuso wabaThethwa, uveze ukuthi inkosi ibiyiNazaretha yingakho nje izofihlwa ngaleli bhokisi.
Uthi ngokujwayelekile uma kufihlwa umuntu oyiNazaretha, kuyaye kuthengwe ibhokisi bese libulawa emathuneni.
“Njengoba inkosi izotshalwa, ngeke kusetshenziswe leli bhokisi elijwayelekile, kuzosebenza elakhiwe ngendwangu futhi lihloniphekile ukuthi lingafihla umuntu osezingeni lenkosi.
"Ngokujwayelekile abantu bakhipha imali eshisiwe bethenga ibhokisi elifike lihlakazwe emathuneni okuyinto esiyibona njengokumosha imali. Lokhu sizama ukukuqeda njengoba nenkosi izofihlwa ngaleli elingeke lihlakazwe elakhiwe ngendwangu,” kusho yena.
Uthi isizwe sonke sigqemeke engeqiwa ntwala njengoba inkosi ikhotheme. Uveze ukuthi ihamba nje, ibisiyenze omkhulu umsebenzi wokuhlanganisa imihlathi eyaza- nayo kwaMthethwa.
"Inkosi ikhothama nje, ibisihlanganise izihlobo zethu eziqhamuka ezindaweni ezahlukene kubalwa eGoli, eLimpopo naseSwaziland. Ngaphandle kokuhlanganisa izihlobo, mningi umsebenzi ewenzele isizwe kubalwa ukwakha inqwaba yezikole, yimitholampilo nezinkulisa. Silimale kakhulu ngokukhothama kwayo,” kusho uDkt Mthethwa.
Uthi banesicelo esizweni sonke sakwaMthethwa ukuba ngalolu suku okuzotshalwa ngalo inkosi, sizothe ukukhombisa inhlonipho.
UNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa Dube-Ncube, udlulise amazwi enduduzo emndenini wachaza inkosi njengemuntu obambe iqhaza elikhulu ekuthuthukiseni umphakathi.
INkosi Mthethwa ngeyesizwe sabaThethwa okukhulele kusona iSilo uShaka kaSenzangakhona, kaJama lapho sicijwe khona ngamasu okunqoba izitha. Kuzokhumbuleka ukuthi iSilo uShaka sathukuthela sathelwa ngamanzi emuva kokuba iNkosi yakwaNxumalo, uZwide ibulale iNkosi yakwaMthethwa, uDingiswayo - okuyiyona eyasicija ngokuningi empilweni.
Inkosi ibingenye yalawo asenesikhathi egade ilanga, okubalwa kuwona iNkosi Sizabantu Gumede, yaKwaMhlabuyalingana eneminyaka engama-92 ubudala kanti iNkosi Mangosuthu Buthelezi - noma ibingagxilile kangako emsebenzini wobukhosi ngenxa yokugxila kakhulu kwezepolitiki - ineminyaka yobudala engama-89.