Uyaveva okudutshulwe imfuyo yakhe ebuka
Uvulele umninipulazi icala
AYAVUTHA yintukuthelo amalunga enhlangano elwa nobugebengu, ikakhulukazi bokwebiwa kwemfuyo, iNkanyamba, ngenxa yomnikazi wepulazi odubule wabulala izinkomo zelunga lale nhlangano ngoba zingene endaweni yakhe.
UMnu Sthembiso Madiba waseNzelu, eMzimkhulu, eningizimu yeKwaZulu-Natal, uthi usekude ukukhohlwa yisihluku esenziwe yilo mnikazi wepulazi odubule wabulala izinkomo zakhe phambi kwamaphoyisa.
Uthi bebehamba ngeloli lithwele izinkomo belibangise eCreighton ngaseXobho, maphakathi neKwaZulu-Natal, ngeshwa lafela eduze kwepulazi lalo mlimi - esingeke simdalule kwazise usevulelwe icala.
Babuyele eceleni komgwaqo bezama ukulilungisa kanti kuzoqhamuka amaphoyisa.
“Amaphoyisa afike asitshela ukuthi ngeke sikwazi ukulungisa iloli nezinkomo ziphakathi kumele sizehlise. Azivulele maqede azifaka epulazini ngoba ethi kungcono zibe khona ngoba zizolinyazwa yizimoto.
“Kuqhamuke umnikazi wepulazi wasitshela ukuthi akazidingi lezi zinkomo endaweni yakhe, ikakhulukazi inkunzi yami, ngoba izokhwela izinkomo zakhe. Sizamile ukuchaza ukuthi ngamaphoyisa azikhiphile, sacela ukuba asivumele sizikhiphe.
“Sizamile ukuzijaha kodwa zabaleka. Kuze kwahwalala sizama ukuzikhipha kodwa sehluleka. Umnikazi wepulazi ube esesiyalela ukuba sishiye umuntu ozosala epulazini azigade zingasondeli kwezakhe, ikakhulukazi inkunzi. Ngakusasa ngiqoqe izinsizwa eziyisi-8 ngoba bengifuna ziyongisiza ukuzama ukuziqoqa lezi zinkomo.
“Ngizishiye kulona obesale epulazini ngahamba ngiyozama iloli esikiti ngoba ngithi ngifuna sizilayishe kulona. Ngisematasa nalokho, ngithole ucingo ezinsizweni engizishiyile zingitshela ukuthi umnikazi wepulazi uphethe isibhamu ufuna ukudubula izinkomo,” kusho uMnu Madiba.
Uthi unikele emaphoyiseni eyowabikela, ahamba naye baphindela epulazini. Amaphoyisa afike akhuluma nomnikazi wepulazi ukuba abadedele bazikhiphe izinkomo, wavuma.
“Ngihambe nawo amaphoyisa sayolinda kwenye indawo senzela ukuba uma ziza ngakithina sizixoshe ziye ngalapho sifuna ziye khona. Sithe sisamile, sezwa sekuqhuma isibhamu. Amaphoyisa angiyalele ukuba ngingabe ngisasondela kuyena njengoba eseze wadubula, kuzoya wona.
“Ngaleso sikhathi ubesadubu- le inkomo eyodwa, amaphoyisa afike akhuluma naye. Kuthe amaphoyisa esakhuluma, wadubula eyesibili. Libuyile elilodwa langitshela ukuthi kakukho angakwenza ngoba uyalwa umnikazi wepulazi.
“Usuke lapho weza kimina wangitshela ukuthi ngilande iloli elizothatha lezi zinkomo zami ezifile. Ngenqabile ukuzithatha ngoba ezami zingene ziphila kuleli pulazi futhi zingafakwanga yimina, zifakwe ngamaphoyisa,” kusho yena.
UMnu Tallman Zuma, umsunguli weNkanyamba, uthi bazolusukumela lolu daba bathole nabameli abazolekelela uMnu Madiba ngoba bafuna zikhokhwe lezi zinkomo ezidutshuliwe.
“Sinezinhlelo lapha enhlanganweni ezilwa nokubulawa kwabanikazi bamapulazi. Lokhu okwenziwe yilo mnikazi wepulazi kusethuse kakhulu ngoba sihlale sigqugquzela ukubambisana phakathi kwabo nemiphakathi yethu ukuze kube nokuthula. Sizoxhumana nehhovisi lomnyango wezokuphepha komphakathi ukuze nawo uzongenelela ngoba kasifuni ukuzibambela umthetho,” kusho yena.
Okhulumela amaphoyisa KwaZulu-Natal, uLt Col Thulani Zwane, uthi kuvulwe icala lokuhlukumeza imfuyo kanti kakukaboshwa muntu.
Uthi ngokujwayelekile uma iloli elithwele izilwane lifile, kakumele kuphele isikhathi esingaphezulu kwamahora ayisi8 zivalelwe, kumele zidedelwe.
Uthi amaphoyisa abengenalo iphutha ngokwehlisa izinkomo elolini.