Ukhiphe ulozolo uJaiva Zimnike
Uthi abaculi abathekele kuye
BASAZOBHEMA bakholwe abathandi bomculo wesintu ngekhono likaMzovukile “Jaiva Zimnike” Khanyeza waseMsamo eNquthu, maphakathi neKwaZulu-Natal njengoba ethi ukuchoma ngengoma yakhe ethandwa ngabantu eNingizimu Afrika yikhona okumenza athi unguthisha wentambo.
Uphekwe wavuthwa nguKhulekani "Mgqumeni" Khumalo (ongasekho) entanjeni nasekubhalweni kwengoma.
Ngeledlule, lo mculi ukhiphe i-albhamu ethi "Isikole Sengoma” kanti uthi ukuhlanganisa izizwe ezahlukene ngengoma kuhamba phambili kuyena, yingakho elande intokazi yaseGermany, uKarin Kedem, kule albhamu.
NgoZibandlela (December) wanyakenye, uJaiva ugalele ngengoma ethi “Siphuzile” ebingenisile ezindaweni eziningi.
“Kulo nyaka ngivula isikole sengoma futhi akekho ongaboni ukuthi ngiqhuba ikhono lami ngiyayidlala le ngoma. “Usengaphika nje ophikayo kodwa yona ingoma iyezwakala impela. Njengoba ngikhiphile nje, ihamba kakhulu, abantu bazothokoza emakhaya,” kusho uJaiva. Uthi akaziphakamisi ngomsebenzi wakhe kodwa baningi abaculi abathekele okukhulu kuyena ngokudlalwa kwentambo, kubalwa uMthandeni “iGcokama Elisha” Manqele, uMroza “Van Damme” Fakude noFalabo Khuzwayo. Uthi yingakho ethi abantu mabaye kuyena beyothekela okuningi ngoba akanawo umona wokusiza. “Senginabo abantu abawumphumela wami emculweni kanti nami ngisafunda okuningi, ikakhulukazi kushuni wakudala ngokusebenzisana neqembu iZingqongqo ngoba uMfiliseni Magubane esibambisene naye uyawazi,” kusho uJaiva.