UMNIKAZI WABANTU UTHI MASIFUNDE UKUTHETHELELA NJENGAMAKHOLWA
NAMHLANJE kule ngosi uShembe nobuNazaretha esayiphiwa nguMhleli nethimba lakhe, ngibhala nje sisemanzini ngokudlula emhlabeni kweNkosi yaseThembezinhle (iNkosi Vela Shembe - etshalwe ngempelasonto eyedlule) njengoba iNkosi uNyazilwezulu (iNkosi Mduduzi Shembe) isho kanjalo ngeSabatha.
Uthi-ke umnikazi wabantu (uNyazi) ufisa nathi sikwazi ukuthethelela nokuxolela njengamakholwa. Nami njengesisebenzi sakhe, ngiqhuba lokho okushunyayelwa yiNkosi uNyazilwezulu. INkosi isifundisa ukuba ngamakholwa alesabayo ihlazo nenhlamba.
Ukukhothama kweMisebeyelanga kakuphathanga nje kabi umndeni wayo kuphela kepha kulimale namaNazaretha wonke hhayi nje abasohlangothini lwayo kuphela.
Ukudlula komuntu emhlabeni kakukaze kube yinto enhle kwabasele. AbaseRoma 14:7-8; “Ngokuba akekho phakathi kwethu oziphilelayo, akekho nozifela yena. Ngokuba uma siphila siphilela iNkosi, uma sifa sifela iNkosi. Ngakho-ke noma siphila noma sifa, singabeNkosi”.
Ngala mazwi kaMphostoli Paul, ngithi dudu ebandleni lamaNazaretha ebeliholwa yiNkosi iMisebeyelanga nasemndenini wayo wakwaNhlanzi. Incwadi ithi noma siphila noma sifa, singabeNkosi. Siyazi vele ukuthi sizohamba lapha emhlabeni siye ekhaya ezulwini kodwa kakubi mnandi ukushiywa ngothandiwe wakho. Phezu kwazo zonke lezo zimo, kakukho okungasehlukanisa nothando lukaJehova.
Ukuba yikholwa kukwenza ushintshe indlela ocabanga ngayo nobuka ngayo izinto. Ngisho nezinto ebezikukhathaza phambilini, kawube usazinaka. Ngiye ngibone abantu bedumisa uNkulunkulu befakaza nangezinto abenzele zona, ngibonge ngithi kuhle lokho kodwa yena lo muntu obefakaza ngobukhulu nangamandla kaNkulunkulu uma esebhekene nezilingo umuzwe esebungabaza ubukhulu bukaJehova.
Ngivame ukuzibona zonke lezo zimanga, kababe besakukhumbula okuhle abenzele khona. Kukhona leyo nkolelo yokuthi babusisiwe nje ngakho konke lokhu abanakho yingoba benza kahle phambi kukaJehova. Kuhle sikhumbule futhi sikhumbuzane ukuthi kasiphili ngoba singcono noma ngoba senza kahle kepha siphila ngomusa kaJehova. Konke esinakho, hhayi ngoba kusifanele, kepha yingenxa yomusa kaJehova.
Ukukholwa okuphelele yilapho uthemba khona uJehova izinto ziphithene, naphambili ungaboni nethemba lishabalala. Yilapho-ke uJehova anyakaza khona emazulwini nezingelozi zakhe. Kunabantu abafuna ukuba uma bekhala kuJehova asheshe abezwe kodwa bona kube kukhona abantu ababasongela ngokuthi kabasoze babaxolela.
Uma uyikholwa ungena kanjani esontweni kukhona abantu ongakhulumisani nabo? Uma ufuna ukuxolelwa wena uyobaxolela nini abakonayo? Mathewu 6:14-15; “Ngokuba uma nithethelela abantu iziphambeko zabo, noyihlo wasezulwini uyakunithethelela nani. Kepha uma ningathetheleli noyihlo akayukunithethelela nani”.
Ikholwa liba nomehluko ngoba nokuphuma emlonyeni walo kusokile. Lokho kwenziwa yingoba sifundiswa indlela yokuziphatha nangendlela esicabanga ngayo.
Uma uthanda ukuthethelelwa wena uyobathethelela nini abakuzondayo? Yebo, uzwe kahle impela, uyobathethelela nini abakuzo-
ndayo? Ingani neBhayibheli liyasho ukuthi masibathande abasizondayo. Kusiza ngani ukuthanda umuntu okuthandayo? Kakusho mina njalo kusho lona iBhayibheli.
Ngivamile ukuzwa ikholwa lifunga ligomela lithi kalisoze lamxolela usibanibani kodwa kusasa liya enkonzweni lifike licele kuNkulunkulu ukuba alithethelele amacala alo. Ngivamile futhi ukuzwa ikholwa likhuluma amazwi alahlisa ithemba. Zonke lezo zinto kakufanele zishiwo yikholwa. UShembe uthi: Nkosi yamukela ithemba lami Nakhu sengiguqe phambi kwakho Woza mntanami Ngokwemukelisa ngethemba “. Manje-ke uma ikholwa selilahla ithemba, uNkulunkulu uzolemukelisa ngani ngoba uyasho ukuthi ngiyokwemukelisa ngethemba. Kakukho lapho uShembe athi uyokwamukelisa ngokukhathazeka nangenzondo onayo nabanye abantu. Jakobe 1:12;
“Ubusisiwe umuntu okhuthazela ekulingweni ngokuba esevivinyiwe uyokwamukelisa umqhele wokuphila”.
Umqhele wokuphila sitshelwa ukuthi siyowuzuza sesikhuthazele ekuvivinyweni. Lapha siyatshelwa ukuthi kwazona izibusiso siyozithola uma sikhuthazelile ekuvivinyweni. Pho wena ucabanga ukuthi ngeke uvelelwe ngokubi futhi kawuzondwa ngoba unjani?
Ingani uShembe wayezingelwa, efakwa emajele engenze lutho, ekhwifwa ngamathe, bemhlahlela ngamageja engasho lutho kepha azigeze aqhubeke nohambo lwakhe. UJesu bamthwalisa isiphambano ababeyombethela kusona kodwa wathi; “Baba, bathethelele ngoba abakwazi abakwenzayo”. Uma wena ungumlandeli kaShembe wehlulwa yini ukuxolela abakuzondayo? Walahla ithemba nje kanti uthini uShembe?
Kuhle ngoba kukhuluma mina esengedlule kuzona zonke izilingo kodwa namanje ngisamile. Bangafakaza abangaziyo kodwa ngisachichima ngothando lukaShembe. Fillip 4; “Ningakhathazeki ngalutho kepha kukho konke izicelo zenu mazaziwe nguJehova..... 7;
Ukuthula okudlula ukuqonda konke kuyakulondoloza izinhliziyo zenu nemicabango yenu kuKristu. 8; Elokugcina bazalwane, konke okuyiqiso, konke okuhloniphekayo, konke okulungileyo - - - - zindlani ngakho”. Okokuqala sitshelwa ukuthi singakhathazeki ngalutho. Uzozibuza mfundi ukuthi kuzokwenzeka kanjani ukuba ungakhathazeki.
Phela uma ufuna ukuzuza ukuthula okudlula ukuqonda konke, uzozama ukungakhathazeki. Kuhle nokuba ushintshe indlela ocabanga ngayo nobuka ngayo izinto.
Lokhu kusho ukuthi ngeke ukuthole ukuthula okudlula umqondo ngoba lapha sitshelwa ukuthi lokho siyokuthola uma singakhathazeki.
Yebo, ushonelwe kodwa kuzokusiza ngani ukukhathazeka ngokukuvelele?
Lapha evesini lesi-8 sitshelwa ngendlela okufanele sicabange ngayo. Kangisho-ke ukuthi imicabango emibi kayifiki kodwa kuhle uyigudluze ngokucabanga okuhle ngoba imicabango emihle yenza nomqondo wakho usebenze ngokukhululeka. UNkulunkulu uhlala esicabangela njalo okuhle nempumelelo noma izimo zibonakala sengathi ziyasimboza. Makabongwe uJehova
Amen