SIBONGA ASIPHEZI NGE-SIMPOSIUM YOMNTWANA UMAGOGO

MHLELI: Ngibonga kuMnu Mbuso Khoza waseShowe nesikhungo sezamaciko KwaMashu (iK-Cap) esiphethwe nguMnu Edmund Mhlongo ngengomboco, iPrincess Magogo International Music Simposium ebiKwaMashu.

UMntwana Magogo Constance Buthelezi wayeyimbongi, umhayi wezinkondlo, iciko nosomlando. Ngeminyaka ye-1950 ubehanjelwa ngongoti bomculo abamhlophe engingabala kubo uMnu Jack Prige, uPeter Becker, uJohn Backy noNkk Ellen Krige.

USolwazi Hugh Tracy owayefundisa umculo wamanothi ( classical music) eRhodes University, e-Eastern Cape, waba ngowokuqala ukuqopha umculo womntwana ukuze ufundiswe ezikoleni futhi uculwe ngendlela yamanothi.

Umuntu oqhakambise izinga lomculo womntwana nguSolwazi Mzilikazi Khumalo. Uwenze wadlala ngamanothi, wawufaka nasemculweni osamdlalo ( opera).

I- opera izakwala kahle uma iculwa ngolimi lwase-Italy ngoba vele lo mculo udabuka khona kodwa ngobuhlakani bukaMntungwa, wawenza waculeka ngesiZulu.

Uma ngibuka isithombe sale nkosazana (Magogo), ukudabuka kwami kubhalwe ebunzini layo, ubuZulu bami bukhazimula ebunzini. Ukudabuka phela kuvela uma ulalele ezinye izingoma zayo ezidlala ngeopera, ibalisa ngokuboshwa kukayise, iNgonyama yasoSuthu, iSilo uDinuzulu, ikhala futhi ngesiqhwaga saKwaMandlakazi, iNkosi Zibhebhu kaMaphitha, eyake yagejana noyise.

Sibonga kakhulu kuMkhathini noMakhedama ngokukhumbula le nkosazane yesizwe ngenyanga efile obukephela iminyaka engama-33 yedlula emhlabeni, yasishiyela ifa laphakade lomculo.