OWE-KINGS UPHITHENE IKHANDA
UPHITHENE ikhanda umqeqeshi weReal Kings United egijima kwiNational First Division (NFD) ngesinqumo okumele asithathe ngabadlali abanamakhadi.
IKings ihlelelwe umdlalo omqoka ezowugijima neHighlands Park wokuhlungela ukungena kwiLast 32 yeNedbank Cup ngoLwesithathu ngo-15h00 eMakhulong Stadium, eTembisa.
USimo “Govuza” Dladla ocija iKings, utshele ILANGA ukuthi usazodla amathambo engqondo ngesikimu. Uthi kunabadlali ababili abamqoka kwezakhe abanamakhadi aphuzi amathathu emunye, okwenza aphithanelwe yikhanda ngokubadlalisa kulo mdlalo womkhumulajezi.
Uthi uSphiwe “Magolide” Mbatha noLuckyboy Mokoena angase aphoqeleke ukungababopheli ngenxa yamakhadi. Uthi angase anike ijezi uMlungisi Mazibuko konozinti ukumzisa isikimu.
“Ngizama ukugcina ukuncintisana kusezingeni eliphezulu. Siwubheke ngabomvu lo mdlalo kwazise ngisanesilonda esibhibhayo ngeHighlands Park. Ibukise ngathi emdlalweni weligi. Nginethemba lokuthi uNkosingiphile Phewa oqophe umlando kule sizini ngokuba ngumdlali wokuqala ukushaya amagoli amathathu emdlalweni owodwa kwiNFD uzoqhubeka nokuwaqobela,” kusho uDladla.
Isiyonke imidlalo yeNFD yokuhlungela ukungena kwiLast 32 yeNedbank Cup imi kanje: KUSASA NGOLWESIBILI
EBlue Downs: Stellenbosch FC vs Mbombela United 15h00. EGoble Park: Super Eagles vs Black Leopards 15h00. NGOLWESITHATHU EMakhulong: Highlands Park vs Real Kings United 15h00. EVosloorus: Jomo Cosmos vs Ubuntu Cape Town 15h00. EHarry Gwala: Royal Eagles vs University of Pretoria 15h00.
EMthatha: Mthatha Bucks vs uThongathi FC 15h00. EParow Park: Cape Town All Stars vs Tshakhuma Tsha Madzivhadzila FC 15h00.
EPuma: Witbank Spurs vs Richards Bay FC 15h00.