Kuvuke imizwa yeNedbank Cup yangowezi-2008
Lbhola leHappy Wanderers likhumbuze uNdlazi owamanqamu
UKHUMBULE impumelelo yakudala kwiNedbank Cup uKenny Ndlazi ongumqeqeshi weHappy Wanderers ebuka le kilabhu igijima ingcwenga yebhola idlulela kwiLast 32 yalesi sigaba emuva kokuguqisa iRichmond FC ngo-3-1 ngoMgqibelo eNorthdale Stadium, eMgungundlovu.
Amagoli enqobe ngawo iWanderers avalelwe enethini nguMbuso “DJ” Mdakane, uMxolisi “Gee” Mazibuko noLindokuhle “Hlompho” Mazibuko.
UNdlazi uthi kuvele kwacweba izinyembezi ebuka iWanderers kwazise ukhumbule iMpumalanga Black Aces abeyicija ngowezi-2008 ifinyelela kowamanqamu walo mqhudelwano yize ibidlala kwiNational First Division (NFD) ngaleso sikhathi.
Sekuwumlando ukuthi i-Aces yahlulwa kowamanqamu yiMa- melodi Sundowns ngo-1-0 wegoli likaLerato “All You Need Is Love” Chabangu.
“Indlela abadlale ngayo ingichaze kakhulu. Ngivele ngakhumbula ngifinyelela kowamanqamu walo mqhudelwano neAces ebengiyicija ikwiNFD ngowezi-2008. Nokho sengizolwela ukuguqula imiqondo yabo bakhohlwe yiNedbank njengoba sinomdlalo onzima weligi neKwaDukuza United FC ngoLwesithathu ngo-15h00 eSouth Coast.
“Okubaluleke kakhulu wukuthatha ikilabhu siyibeke endaweni enhle kwi- log ibalwe nasesicongweni kwazise iseyinde indlela esazohanjwa,” kusho uNdlazi ofike nolukhulu uguquko kule kilabhu yasoGwini.
Isiyonke imidlalo yeSafa KZN ABC Motsepe League ehlelelwe ukugijinywa ngoLwesithathu ezinkundleni ezahlukene imi ngalolu hlobo:
ESouth Coast Academy: Happy Wanderers vs KwaDukuza United 15h00.
EMakhehleni Ground 1: KwaMashu All Stars vs Ladysmith United FC 15h00.
EMhlathuze Sports: Milford FC vs Natal United FC 15h00.
EMbali Stage: Drakensburg FC vs UMvoti FC 15h00.
ENorth Dale: Maritzburg City vs Summerfield Dynamos 15h00.
EWorkington: GWP Friends vs Ses’Khona 15h00.
ESJ Smith: Ashley United vs Edendale Juventus 15h00.