Usefakwe endalini oyamaniswa neChiefs neBucs
LPMB United seyizimisele ngokudedela uRusike
USEMFAKE endalini umgadli ofunwa yizinkunzi zaseSoweto uFarook “Ntshebe” Kadodia ongumnikazi weMaritzburg United. I-United isiqala ukubuyelwa yifomu njengoba iphinde yajabulisa abalandeli bayo iguqisa iBaroka FC ngo-3-0 koweAbsa Premiership ngoLwesihlanu ebusuku eHarry Gwala Stadium, eMgungundlovu.
Amagoli eTeam of Choice ashaywe ngu-Evans Rusike amabili, kwathi elokushayelela isipikili leza noSiphesihle “Mbesuma” Ndlovu. Kuzokuthi ngoLwesithathu ngo-19h30 iMaritzburg igadulisane neMamelodi Sundowns kowe-Absa Premiership eLoftus Versfeld Stadium, eTshwane.
URusike kuke kwabikwa ukuthi ufunwa uthuli yiSundowns, yiKaizer Chiefs ne-Orlando Pirates. Kuwona wonke la makilabhu lo mdlali uveze ukuthi angakujabulela ukujoyina iChiefs ukuze adlale nomkhaya wakhe uWillard “Salt & Vinegar” Katsande abanobudlelwano obuhle naye.
UKadodia obejabulise okwengane inikwa amaswidi emuva kokuba ezakhe zihlule iBaroka, utshele leli phephandaba ukuthi angamudedela noma yinini uRusike yinqobo nje uma ezothola imali ezomugculisa.
“Njengamanje akekho umuntu oseke weza kimina ngodaba lwakhe. Mhlawumbe ngenyanga ezayo kukhona ozoqhamuka sekuvulwe iwindi lokudayiselana ngabadlali. Ngifuna ukukubeka kucace ukuthi uRusike usendalini, ozoza nemali engigculisayo nje ngingamudedela ngaphandle kwenkinga.
“Okwamanje ngeke ngisho uku- thi ngingamdayisa ngamalini, ngingabonisana nabamufunayo. Sisebhizinisini futhi-ke thina siyayidinga imali njengoba singenabo abaxhasi,” kusho uKadodia. Ephawula ngomdlalo weSundowns, uthi unovalo ngawo.
“ISundowns ikhombisa ukubuyelwa yifomu ikakhulukazi uma isekhaya. Kuzofanele sizibambe ziqine kulo mdlalo yize kuzokuba nzima. Uma sibuye nephuzu ngizojabula, amathathu sekungaba yibhonasi. Akulula ukuphuma namaphuzu amathathu kwiSundowns yingakho ngifuna iphuzu nje qha,” kusho uKadodia ezakhe ezinenebule kanzima iCape Town City ngo-4-2 ngoLwesibili olwedlule KwaMashu.
UKadodia ephawula ngodaba lukaDevon Saal odlala esiswini okuthiwa uhilizisane nomqeqeshi, uFadlu Davids, ngoba engamubopheli esikimini, uthe: “Okwamanje asikanqumi ngekusasa lakhe kungenzeka simubolekise kumbe simudedele. Wenze into embi, uhilizisane nomqeqeshi ngakho-ke kuyacaca ukuthi ubudlelwano babo abusekho buhle yingakho kufanele sizame ukuqhamuka nesixazululo kule nto. Ukholwa wukuthi kufanele ayiqale imidlalo kanti umqeqeshi akaboni kanjalo. Yisimo esinzima lesi esingamukelekile.”
Omunye umdlalo ozokuba ngoLwesithathu ngophakathi kweFree State Stars neSuperSport United ozoqala ngo-19h30 eGoble Park, eBethlehem.