OWE-BUCS UGXEKA ABADLALI NGOKUMDAYISA OSUTHWINI

UDINWE uthelwe ngamanzi uMilutin “Micho” Sredojevic ongumqeqeshi we-Orlando Pirates okholwa wukuthi kunabadlali abamhlinzela ezibini.

IBucs ishayane yaze yabukana namaZulu FC kuba ngu-1-1 koweAbsa Premiership ngoMgqibelo ebusuku e-Orlando Stadium, eSoweto. USuthu yilona olubone imbobo yepali kuqala ngesikhathi uNtsikelelo Nyauza oyisitobha seBucs elihlaba ekhaya ngomzuzu wama-23. Uphinde walilungisa iphutha ngomzuzu wama-35 elishaya epalini elifanele, zalingana.

USredojevic uzwakalise ukudinwa ngabadlali bakhe njengoba ekholwa wukuthi bacekela umsebenzi omuhle awenza isonto lonke ejimini elungiselela umdlalo.

“Uma sisejimini zonke izinto sizenza kahle, sifike emdlalweni ngibone into ehlukile. Abadlali bami bayangicekela, basenzela phansi. Bekungafanele nje sicazelane amaphuzu namaZulu. Lo mdlalo bekufanele siwunqobe ngembudlu yamagoli.

“Indlela esishweba ngayo ngathi senza ngamabomu. Nokho ithemba kalibulali, ngizoqhubeka nokuyi- lwa le mpi enzima engibhekene nayo,” kusho uSredojevic.

UCavin Johnson ocija AmaZulu FC, uthi ezakhe azibanga nomdlalo omuhle.

“Isiwombe sokuqala sisidlale kahle, ngesesibili kuvele kwaba sengathi singenwe amanzi emadolweni, besinovalo. Besingabonwa nangokhalo ngesiwombe sesibili, kahle kahle nje kasibanga nomdlalo omuhle. Ngibonga kakhulu unozinti wethu, uBoafela Pule, ukhombisile ukuthi akaholeli amahhala, usebenzile. Nokho ngijabule ngoba sibuye nephuzu elimqoka ekuhambeni,” kusho uJohnson.