LUNGA SOKHELA
USIBA lwami lushibilika kamnandi njengoba ngiloba le ngosi emuva kokuba kujeziswe onompempe abahubhuza amanga besola abadlali bamaZulu FC ngokuthi babahlukumeza emdlalweni neBaroka FC eminyakeni emibili edlule.
Isigcawu sokuqondisa izigwegwe (esihlale eminyakeni emibili edlule) sisabuya emqondweni wami sengathi besiyizolo. Onompempe batheleka ezindlini zethu zokushintshela basola abadlali bethu ngokubathela isibhaxu.
Bakhombisa nezithombe zezinyawo ezazivuvukele nokunye. Ngendlela abenza ngayo, empeleni bekumele bathole umklomelo womhlaba (Oscar) ngeqophelo eliphezulu lokuzenzisa.
Ngesikhathi ngilalele ubufakazi babo ngishaqekile ngamanga abawashilo. Kuvele kwacaca bha ukuthi bebehlose ukucekela ikusasa labadlali kanjalo nelekilabhu.
Nokho ngobuwula babo, balibala wukukhumbula ukuthi kunobufakazi obuqoshiwe bakho konke okwenzeka ngaloluya suku, esikwazile ukubuthola.
Ngesikhathi sesikhombisa lobu bufakazi, indaba yabo ivele yakhahlelwa ngazo zombili kwacaca ukuthi bazakhela lolu daba futhi babesenga ezimithiyo sonke lesi sikhathi.
Lokhu kubuye kwakhombisa ukungawazi umsebenzi komshushisi wamacala ePremier Soccer League (PSL), uNande Becker. Empeleni usithatha kanjani isinqumo sokulahla abantu ngecala ungalwenzanga uphenyo olunzulu?
Okucasula kakhulu wukuthi bekufanele ngiphinde ngimkhumbuze ukulandelela lolu daba kwiSouth African Football Association (Safa) okuyinto abengazimisele ngokuyenza.
Lokhu kukubeka ngokusobala ukuthi akawazi umsebenzi wakhe futhi iPSL kumele imkhombe indlela ukuze iqhubeke nokudlondlobala. Nokho sigezeke ubebebe ngokuthi ubulungiswa bugcine benzekile yize ngikholwa wukuthi laba onompempe bekumele baxoshwe unomphela kunobhutshuzwayo.
SIBUYEKEZA IZINKONTILEKA ZABADLALI
Sisebenza ngokukhulu ukubambisana nethimba labaqeqeshi bethu ukubheka izindawo okumele ziqiniswe njengoba sibheke ekuvulweni kwewindi lokudayiselana ngabadlali ngoMasingana (January).
Wonke umdlali osekilabhini isi- cutshungulisiswe kahle indaba yakhe nezinqumo zokunqamula izinkontileka zabanye zathathwa.
Sibuye sakhulumisana namanye amakilabhu ukuwaboleka abadlali abathile njengoNkanyiso Zungu ozokuya kwiJomo Cosmos. Sethemba ukuthi uzolithola ithuba lokudlala ukuze abuye esevuthiwe.
Maduzane sizokhipha uhlu lwabadlali esibachithayo. Sizobuye samukele uSibusiso Mabiliso oyibambe kumaJita (SA U/20) adlala iCosafa U/20.
Okunye okungijabulisa kakhulu wukuthi bonke abadlali bethu bayimiqemane ngaphandle kukaJabulani “JB” Ncobeni. Lokhu kuzokwenza ukuba sibe nesikwati esiqinile emidlalweni yethu ezayo.
IZINSUKU EZINTSHA ZEMIDLALO YETHU EHLEHLISIWE
Kunemidlalo emibili esisele ngayo kwiligi ehlelelwe ukuba siyigijime ngoMasingana lapho sizobhekana khona neBloemfontein Celtic ngomhla zingama-24 noweSuperSport United ngomhla wama-31.
Lokhu kusho ukuthi uMasingana uzokuba yinyanga eshubile kakhulu kithina njengoba sizogijima imidlalo eyisi-6. Sizosheshe sibuye ekhefini lokuphela konyaka ukuzoqala uhlelo lokubhekana ngempumelelo nalesi simo.
ISIKHUNGO ESIQAVILE SOKUTHUTHUKISA ABADLALI
Izikwati zethu zabadlali abasathuthukiswa seziwuvalile unyaka. Kuningi ezikuzuzile njengokufinyelela kowamanqamu weMcDonalds nokunqoba amaligi kwi-U/13 nakwiU/15 ngokwahlukana.
Nokho kangikagculiseki neze. Izinhloli zethu zisazohambela imiqhudelwano eyahlukene ngenhloso yo- kuvundulula amakhono entsheni ukuqinisa izinhlaka zamaZulu FC.
Nginelikhulu ithemba lokuthi lokhu kuzokwenzeka njengoba sigabe nangabadlali bethu bakudala, u-Ayanda Dlamini noBelix Bukasa ukwenza lokhu.
Kuyajabulisa nokubona abaqeqeshi bethu abasebancane bekhula, ngihlose nokubeseka kakhudlwana ngonyaka ozayo ukuqinisekisa ukuthi siphenduka isikhungo esiqavile sokuthuthukisa abadlali eNingizimu Afrika yonkana.
SEZIHUBELA SAKUSHA
Ngisaphinda ngikhuthaza abalandeli ukufika ngobuningi emidlalweni yethu ukuzofaka abadlali ugqozi. Sesizoqala ukubheka emaphethelweni eligi ngakho ukwesekwa ngabalandeli sizokudinga kakhulu kunakuqala emidlalweni yethu. Ngifisa ukunibona nigcwele inkundla nidlubhe ezoSuthu.