Ithuba lokuziveza kwabasafufusa
Ezikamaskandi zizoyibhikla eMzimkhulu
KUZOVUMBULULWA amaciko amasha emunxeni kamaskandi eMzimkhulu ukuze kugqanyiswe ikhono lawo kwazise kubukeka becindezelekile abacula lo mculo kule ndawo.
Lokhu kushiwo nguMnu Sibongeleni Dlamini weDlem’s Music Experience ohlele umcimbi kamasikandi ngeSonto eMovers Stadium KwaBombo, khona eMzimkhulu, ukuze amaciko asemnkantshubomvu ezohlonza anekhono elibabazekayo kule ndawo.
Utshele ILANGA ukuthi kuzobe kungokokuqala abantu baseMzimkhulu bebona izihlabani zikamasikandi abagcina ngokuzilalela emisakazweni noma bazibone kumabonakude.
Uthi maningi amakhono kule ndawo kodwa kawanakekile yingakho efisa ukuba le ndawo ithuthuke, kulekelelwe amaciko angakwazi ukuziphilisa nemindeni yawo.
“Kubalulekile ukubuyisela emphakathini ngijabulise abantu bangakithi. Kulo mcimbi sizonikeza ithuba amaciko aseMzimkhulu asavelela, angene phakathi kwezinkunzi ukuze umphakathi uzobona amakhono ahlukene. Bekuyisifiso sami seminyaka ukuba le ndawo nayo iphakame ifane nezinye.
“Abantu bangakithi bawezwa ngendaba amaciko yingakho kumele sibalethele izinto ezinhle, okungasiza bona bathole amathuba emisebenzi. Sizoqala ngomqhudelwano kanobhutshuzwayo, siklomelise abazophuma phambili ngemali elinganiselwa ku-R200 000,” kusho uMnu Dlamini.
Uthi kulo mcimbi kuzobe kungenwa mahhala ngoba inhloso yakhe enkulu wukuba kubusiseke umphakathi wasendaweni ozophinde welulekwe nangezinto eziningi - uzoxwayiswa ngokudlwengulwa kwabesifazane.
Utshele ILANGA ukuthi kuzobe kuboshelwe abaculi okubalwa kubona uMjikijelwa “Chalaha likaShafuza” Ngubane, uKhuzani “Ndlamlenze” Mpungose, oSaziwayo, Thokozani “Somnandi‚” Langa, Mzovukile “Jaiva Zimnike‚“Khanyeza, Mroza “Van Damme‚” Fakude, Dlubheke, uQhosha, Abafana bakaMgqumeni, uBahubhe, iChwane Lebhaca, uShwi noMtekhala, iNyonemhlophe, iThwasa Lekhansela, aMabutho, uSgwebo Sentambo, uMdumazi, uMbuzeni, uGadla, uMfezemnyama, uMkhathazi, uNjoko, u-Ali Mgube, uMntuyenziwa, oSukasambe, oFeleba, uMgqilazi, uGobelempundulu, uMajotha, uMshebelezi, uDumakahle, uBobo Mfana wePiki, Amageza Amahle, uThulebuka, uSkele Mbhele, uZulu Messengers, uHlanganani namaNMZ.
Abaphathi bohlelo ngabasakazi boKhozi FM, uKhathide “Tshatha” Ngobe noZimiphi “Zimdollar” Biyela.