BAKHISIMUSE OWENDIDANE
KWENZEKE okungavamile ngoMgqibelo ngesikhathi abalandeli bakaMtshengiseni “iNdidane” Gcwensa (ongasekho) - obebalwa nezinkunzi emculweni kamaskandi - benikeza ingoduso yalo mculi isheke ngoba bethi bakhombisa ukuthi bebelithanda kanjani iqhawe labo.
Leli sheke, abathe ngelikaKhisimusi, balinike uNkz Zothile Ziqubu oyingoduso yeNdidane. Ngokusho komholi wabalandeli beqembu Amageza Amahle - ebeliyibambe neNdidane - uMnu Veloh Bhengu, le mali bayiqongelele ngoMbasa (April) kuwona lo nyaka ngokucela ukuba izikibha eziwumfaniswano wamaGeza zithengwe kumu- ntu oqokwe yibona. “Kunabantu abahlomulayo ngegama likaMtshengiseni alisebenzele kanzima kodwa umndeni wakhe ungatholi lutho ekubeni sazi kahle ukuthi akekho umuntu ongenisa isinkwa khona.
“Sihlale phansi nengibambisene nabo saqhamuka nomqondo wokuthi sifune umuntu wethu ozokwenza lezi zikibha, amakepisi nakho konke okunombhalo weNdidane bese inzuzo etholakele siyihambise kwaGcwensa. Kasizange sibabikele abalandeli ngale nto,” kusho uMnu Bhengu.
Uthi bebetshela abalandeli ezinkundleni zokuxhumana ukuthi ukuze umfaniswano wabo uzofana, kungcono wenziwe kumuntu oyedwa - nakuba bebenenhloso bona beyizinduna.
Uthi konke okugqokwa ngabalandeli emicimbini yomasikandi, kuxhunyanwa nabo beyizinduna.
“Bakhona abazithungela ezindaweni zabo kodwa thina lapho esihlangana khona singabala- ndeli baMageza, sitshela zonke izinduna emagatsheni ethu ukuthi mazitshele abantu ukuthi kunomuntu osenzelayo umfaniswano,” kusho uMnu Bhengu.
UNkz Ziqubu uthi uthando olukhonjiswa yilaba balandeli kuyena luyamangalisa. Uveze nokuthi selokhu kwahamba iNdidane kabakaze balale bengadlile ngoba abalandeli bayo baneqhaza elikhulu abalibambile.
“Bayafika bezosibheka lapha ekhaya, lokho kuveza ukuthi bayamthanda uNdimande noma engasekho. Ngiyabonga kakhulu ngomnikelo omkhulu kangaka, namanje ngisajabule ngendlela okubanjiswene ngayo kubalandeli.
“Buka nje izingane sezizoba noKhisimusi omuhle ngenxa yabo,” kusho uNkz Ziqubu.
INdidane idlule emhlabeni ngoNtulikazi (July) wezi-2015 emuva kokuhlabeka. Ishiye izingane eziyisi-9.