Umkhankaso wokusoka

Bagadla ngengoma kaKhuzani

UYAQHUBEKA umkhankaso wokugqugquzela abesilisa ukuba basoke njengoba lo mkhuba usiza ekunciphiseni izifo ezithelelana ngokocansi.

Lokhu kugqanyiswe ngeledlule kwaMuhle Museum, eThekwini kwethulwa ngokusemthethweni ingoma okuhloswe ngayo ukugqugquzela ukuba abesilisa basoke.

UNkz Wendy Khumalo, okwezokuxhumana enhlanganweni engenzi nzuzo, iCommunity Trust Media, uthi baphume umkhankaso wokukhuthaza abesilisa ukuba basoke.

Lo mkhankaso bazowududula iNingizimu Afrika yonke. Uthi basebenzisana nomculi kamaskandi, uKhuzani “iNdlamlenze” Mpungose, oyinxusa labo.

Nguyena uKhuzani oqophe le ngoma esebenzisana nembongi uSiyabonga Mpungose.

“Sizimisele ngokwenza ume- hluko kubantu bakithi yingakho sisebenzisana noKhuzani ngoba nguyena umculi olandelwa yizinkumbi zabantu. Ukusebenzisana naye kuzokwenza kube lula ukuba umyalezo usheshe ufike kubantu kwazise konke akwenzayo bayakulandelela,” kusho uNkz Khumalo.

Uthi okunye abakuthandayo ngalo mculi wukuthi ocwaningweni abalwenzile bathole ukuthi izingoma zakhe zikhuluma ngezinto ezithinta abantu ngqo.

“Thina sifuna abantu besilisa banakekele impilo yabo, basoke yingakho nengoma eyenziwe ithi “Soka Ndoda” sizoyisabalalisa ezinkundleni zokuxhumana nasemisakazweni.

“Ukusoka kunezithelo ezinhle kakhulu kwezempilo, kunciphisa amathuba okuthelelaka ngezifo,” kusho yena.

UKhuzani uthi abantu babhekene nezinselelo eziningi kanti izifo ziyingxenye enkulu yazo. Uveze nokuthi le ngoma ufuna isabalale njengoba kuyisikhathi samaholide kaKhisimusi.

UMntwana Nhlanganiso Zulu ngomunye wabantu abebekhona ukuyokweseka lo mkhankaso.

ISITHOMBE NGU: JOHN HLONGWA WANGIKITAZA inhliziyo ntombi ngaze ngakhumbula ingoma kaJabu Khanyile ethi “Mmalo -We” lapho esethi: wamuhl’ umuntu. Le ntokazi nguBongiwe Gumede (21) waseMpangeni, wenza izifundo zeFinancial Accounting Management eDurban University of Technology....