Zihlakaniphele izibiliboco zikaKhisimusi
NGOKWEDLULE kule ngosi sikhulume ngengozi yokusebenzisa budedengu uphuzo olunamandla ngalesi sikhathi sonyaka, esidume ngamadili nokuzibusisa ngakho konke okumnandi. Namuhla sininikeza amathiphu ngezinto ezimnandi, ezidliwa ngalezi zinsuku.
1) THENGA NGENDLELA EHLELEKILE
Ukuhlela indlela odla ngayo kuyasiza ukuba ungadli weqise. Ungayi ukuyothenga igilosa ulambile ngoba uzozithola usubutha konke okunemibala ekhangayo emashalofini okudla kulesi sikhathi sonyaka.
Loba uhlu lwegilosa olulinganiseke kahle futhi oluxube izidlo ezimnandi kodwa ezinempilo njengezithelo no-popcorn.
2) UNGAZILAMBISI
Ukweqisa isikhathi sokudla kungakwenza udle izikhathi ezimbalwa kepha udle ngokweqile. Uma wenza lokhu, uzifaka engozini yokuzimuka.
Ukudla kaningi kodwa uphake kancane kungakusiza ukuba ungadli weqise.
Kulungile ukudla kancane ngaphambi kokuya emcimbini ukuze ungafiki uwolele ukudla okuningi ngesikhathi esisodwa.
3) HAMBAHAMBA LAPHO NIHLANGANELE KHONA
Musa ukunambitha konke okukhona okudliwayo okunikwa ngoweta. Imibuthano yithathe ngokuthi iyithuba lokuhlangana uncokole nabantu oqalayo ukubabona.
Ungagxili kakhulu kokudliwayo sonke isikhathi. Nxa kuwumcimbi ofika uphethe oku- thile kuwona, qiniseka ukuthi ufika nezinto ezidliwayo ezinempilo njengamasaladi nemifino.
4) NCIPHISA OPHUZWENI OLUNAMANDLA
Yidla ukudla ukubhalansise kahle ngaphambi kokuphuza utshwala, futhi phuza amanzi emuva kwalokho nalokho kuqhabula etshwaleni.
Lokhu kukusiza ukuba isilinganiso sotshwala obuphuzile sibe sincane ukuze ungabonakali usubhubhuza usuwedlula wonke umuntu olapho ngokweqiwa ngamanzi amponjwana.
Uma uzwa ukuthi sengathi uphuzo seluyenyuka, yima futhi ukhumbule nokuthi udle kangakanani.
5) ISIDLO SAKUSIHLWA MAKUBE NGESINEMPILO
Qiniseka ukuthi ukudla kokwendlalela kuba yimifino, amakinati noma yizithelo. Makube kuncane ukudla okukhiqiziwe njengamasausage, wupholoni ne-ham uma kunokwenzeka.
6) KHETHA IPULETI ELINCANE
Ipuleti elincane liyakusiza ukuba ungaphaki kakhulu. Ligcwalise ngezithelo nangemifino bese ukudla okunesitashi kube ngangenqindi yakho kumbe ingxenye eyodwa kwezine (1/4) yesilinganiso sokudla okuphakile.
Enye ingxenye engangalena ma- kube wukudla okunesakhamzimba i- protein - okungaba yinyama noma ubhontshisi. Yidla ngesine-ke ungaphangi ukuze uzwe uma sewusuthi.
Phela nxa uphanga kuthiwa kawusheshi ukuzizwa ukuthi sewudle wasutha.
7) DANSA
Ukudansa lokhu kakugcini nje ngokunika intokozo kepha kuyasiza ukuba ushise amafutha angene nokudla emzimbeni.
8) PHUZA KANINGI AMANZI
Esikhundleni sokukhetha iziphuzo ezimnandi ngokuba noshukela, wena zitholele amanzi ozodamane uwaphuza ngesikhathi ubingelelana nabantu abasemcimbini.
Isandla odla ngaso makube yisona obambe ngaso ingilazi ukuze ungalingeki uzithole usuthatha ukudla ngaso ngesikhathi ubambe ingilazi yamanzi ngesinye isandla.
9) KONKE KWENZE NGOKUZILINGANISELA
Okunye kwalokhu ungadamane ukuthatha ngamaconzuconzu: imifino enokhilimu, wukudla okuthosiwe, ushizi, amakhekhe, ophaya neminye imibhako.
10) AMA-DESSERT
Izibiliboco ezingama- dessert phaka kancane kuzona kodwa kuhambisane nengxenye enkulu yesaladi eliyizithelo.
Uma wenza i- dessert gwema ukhilimu kodwa usebenzise ubisi olwenguliwe ulaza. Thinta nje kancane kwi- salad dressing ngoba inamafutha.