UTAU WETHEMBISA UBENNI INDUKU
UMGADLI weMamelodi Sundowns ovutha engabaselwe kulezi zinsuku usongela ezikaBenni McCarthy iCape Town City.
IDowns izobhekana neCity kowe-Absa Premiership kusasa ngoLwesibili ngo-19h30 eLoftus Stadium, ePitoli.
IDowns iya kulo mdlalo nje, ngoMgqibelo ntambama inenebule ngo-4-1 iBloemfontein Celtic kowe-Absa Premiership kuyo le nkundla.
Amagoli ayo ashaywe nguThokozani Sekotlong, Tiyani Mabunda, Percy Tau noThemba Zwane, kwathi eleCeltic lona leza noRonald Pfumbidzai.
UTau oseshaye amagoli emidlalweni emine ilandelana, uthi bazoqhubeka lapho begcine khona ngokubhabhadisa ezikaMcCarthy.
“Indlela esidlala ngayo yenza ngingabi navalo ngezimbangi esisuke sizobhekana nazo.
"Ngendlela esibambisene ngayo siyinto eyodwa, yingakho kungeke kube lula ukuthi sihlulwe.
"Nakulo mdlalo wethu neCity nayo izothola okuyifanele,” kusho uTau.
UMcCarthy uthi iDowns iyavutha, kuzofanele basebenze ngokwengeziwe.
“Into enhle ngeSundowns wukuthi iyawasebenzisa amathuba ewatholayo, yilowo umehluko uma uyiqhathanisa namanye amakilabhu.
"Kodwa-ke siyakwazi okufanele sikwenze kulo mdlalo yize nginovalo ngayo njengoba ivutha nje,” kusho uMcCarthy.
Komunye umdlalo we-Absa Premiership, iBloemfontein Celtic izodudulana neSuperSport United ngoLwesithathu ngo-19h30 eDr Molemela Stadium, eFree State.