UZOKHUCULULA INSILA UMQEQESHI WE-PIRATES
UMQEQESHI we-Orlando Pirates uMilutin “Micho” Sredojevic uthi lizogaya ngomunye umhlathi kule kilabhu ngonyaka ozayo njengoba ezimisele ngokukhuculula insila embi.
IBucs iwuvale kabi unyaka iguqiswe ngo-2-1 yiFree State Stars kowe-Absa Premiership ngoMgqibelo kusihlwa eGoble Park Stadium, eBethlehem.
Amagoli okuguqe ngawo iBucs kube wumkhonto ogwaze ekhaya ka-Abbubaker Mobara nelikaSinethemba Jantjie, kwathi eleBucs lona lashaywa nguThabiso Kutumela.
“Indlela esihlulwe ngayo ayingigculisanga neze ngoba umdlalo besiwuthwele kodwa senza into efanayo ukushweba amathuba.
"Kodwa-ke lizogaya ngomunye umhlathi ngonyaka ozayo, liyavulwa iwindi kuzofanele kuhlungeke bese kuhleleka kahle izinto.
"Noma kanjani kufanele singene emakethe ukuze kuzonyuka amasokisa nakulaba abawehlisile,” kusho uSredojevic.
ULuc Eymael ololonga iFree State uthi uzogcina emelwe yinhliziyo ngendlela abadlali bakhe abashweba ngayo amathuba.
“Ngiyopholisa ikhanda iviki lonke eGoli. Ngiyakudinga ukuphumula.
"Ngendlela abafana bami abashweba ngayo ngiyabona ukuthi ngizogcina ngimelwe yinhliziyo.
"Phela mina sengimdala, iminyaka ihambile angiyidingi le nto.
"Kodwa-ke ngijabule ngendlela esisonge ngayo, sinqobe imidlalo yethu yomibili yokugcina,” kusho u-Eymael.