UShembe ugeze "amasosha"
AbeMK banethemba lokuphela kwesinyama
KWENZEKE ingqophamlando ngeSonto KwaMashu, enyakatho yeTheku, ngesikhathi ibandla lamaNazaretha ohlangothini lwaseBuhleni - oluholwa yiNkosi Mduduzi kaVimbeni ka-Amos kaMudliwamafa Shembe, uNyazilwezulu - ligeza amalungu oMkhonto Wesizwe (MK) nawe-Azanian People's Liberation Army (APLA), ashonele kwamanye amazwe eminyakeni edlule.
Kulo mcimbi bekukhona namalungu emindeni yamanye amasosha aphangalala ezintabeni ngesikhathi kulwiwa nohulumeni wobandlululo.
Kuchwaze izindimbane zabalandeli baleli bandla ngesikhathi uNyazilwezulu lukhumula umjiva, olujwayele ukuwufaka uma lushumayela, lwadlubha obufana ncamashi nowamasosha ngesikhathi seluwageza.
UNdunankulu waKwaZuluNatal, uMnu Willies Mchunu, uMnu Sihle Zikalala, obengusihlalo we-ANC KwaZulu-Natal kodwa ubuholi bakhe bachithwa kabili yiNkantolo eNkulu yaseMgungundlovu, uMnu Super Zuma, obengunobhala we-ANC ngaphansi kukaMnu Zikalala, kabasalanga nabo ekugezweni wuNyazilwezulu nalo oluchithwe yiNkantolo yaseThekwini njengomholi waseBuhleni. Kulindwe isinqumo mayelana nokudluliswa kodaba.
Okuvelile kulo mcimbi wukuthi njengoba iKwaZulu-Natal igobhoza igazi kangaka, osopolitiki bephela yinhlamvu, lokho kuthiwa kudalwa wulaka lwamasosha afa eminyakeni eyedlule, akhala ngokuthi imimoya yawo kayiphumule lapho elele khona.
Kubuye kwavela nokuthi iKwaMashu isithathwa njengegobhoza kakhulu igazi kanti ukumenywa koNyazilwezulu kukholakala uku- thi kuzoqeda umkhokha.
Njengoba amasosha abehambele lo mcimbi egezwe ngamanzi abusiswe yinkosi yamaNazaretha aseBuhleni, kukholakala ukuthi asehlambulukile, sekuzoba nomehluko.
USihlalo weMK Military Veterans Association (MKMVA) KwaZulu-Natal, uMnu Themba Mavundla, uveze ukuthi njengoba bebengageziwe, bebezibona befana ncamashi neqaqa elinukayo ngoba bebengathandeki neze.
“Njengoba simi phambi kwakho Nyazilwezulu, sikholwa wukuthi uzosigeza leso sinyama, sithandeke, siqasheke njengoba okwama- nje sidla emgqonyeni,” usho kanje kwancinciza izinkumbi ebezihambele le nkonzo.
Selukhuluma namasosha uNyazilwezulu, luqale ngokuwabongela ngokuba nenhlanhla yokugezwa. Luwathembise ukuthi asehlambulukile, lwathi lufisa kube nokuthula ezweni lonkana.
“Sengathi uNkulunkulu anganenzela konke okuhle enikufisayo ngalo nyaka. Masikhulekele ukuthi izwe lethu lilwe into eya phambili,” kusho uNyazi.
Yize ilanga belikhipha umkhovu etsheni, abantu babukeke bengaligqizi qakala njengoba behlale phansi amahora angaphezulu kwayisi-6 belalele zonke izinkulumo ebezethulwa.
Ngesikhathi kwenziwa umcimbi, bekushunqa uthuli njengoba bekunomgidi wezintombi, izikotshi (izinsizwa), izinjobo (abesilisa asebekhulile) nengudlungudlu (omama) ngemuva nje kancane kwalapho bekubuthene khona abantu abebethamele umcimbi.
UMnu Zikalala ubongele amasosha ngokwenzelwa umcimbi, wathi ukuba yingxenye yomcimbi wamaNazaretha kwe-ANC kuqhutshwa wubudlelwano bakudala phakathi kwalezi zinhlangothi.
“Umengameli we-ANC wokuqala, uJohn Dube, wayexhumene kakhulu nomsunguli waleli bandla (uMprofethi u-Isaiah “Mqaliwendlela” Shembe) kangangoba kakukho ayengambikeli khona uma kunezinto ezenzekayo kwiANC,” kusho uMnu Zikalala.
NgoNcwaba (August) wezi-2017, ubuholi bukaMnu Zikalala buklwejwe ngejozi yiNkantolo eNkulu yaseMgungundlovu ngesikhathi inquma ukuba ingqungquthela obukhethwe kuyona ebimhla ziyisi-5-8 kuLwezi (November) wezi2015 eMgungundlovu, ithathwe njengento engekho.
Kule ngqungquthela uMnu Zikalala wehlula uMnu Senzo Mchunu obevele engusihlalo. Abeseka uMnu Mchunu, kubalwa uMnu Lawrence Dube wasebaQulusini, enyakatho yeKwaZulu-Natal, banikele enkantolo ngoba bethi kuningi okungahambanga kahle ngengqungquthela.
Emuva kwesinqumo senkantolo, ubuholi bukaMnu Zikalala busidlulisile isinqumo kodwa izinto zaphinde zangabuvuna njengoba ngoZibandlela nyakenye inswani ingene esiphangeni kwi-ANC KwaZulu-Natal ngesikhathi inkantolo efanayo inquma ukuba isigungu sayo sihlakazwe, ubuholi buphume ehhovisi ngesikhathi kusahlelwa ukuthi kumiswa kanjani ngesimo.
Lesi sinqumo sigadle kabi kwiANC KwaZulu-Natal njengoba amalungu ayo ali-15 kwangama-27 abefana nezivakashi engqungqutheleni yokukhetha ubuholi bukazwelonke eqale mhla zili-16-20 eNasrec, eGoli ngoZibandlela.
Kucishe kube ngesifanayo kwaShembe njengoba kulindwe isinqumo phakathi kombango wohlangothi loNyazilwezulu nolweNkosi Vela “Misebeyelanga” Shembe yaseThembezinhle ekhothame ngoZibandlela - isikhundla sathathwa ngumfowabo, iNkosi Thanda Shembe.