Basola amaphoyisa ngolwakwaShembe
Bathi kawaqinisekisanga ukuthi akekho ozophazamisa uhambo lwabo
AGXEKE amaphoyisa ngokungaqaphi isimo ngendlela efanele amaNazaretha ohlangothi lwaseKuphakameni oluholwa yiNkosi Vukile, kaLonda, kaGalilee kaMudliwamafa Shembe ngesikhathi eqala uhambo lwawo olubheke eNtabeni eNgcwele, iNhlangakazi, eseNdwedwe, enyakatho yeTheku ngoLwesibili.
Akhale ngokuthi kunabantu abaqhamuka ohlangothini lwaseBuhleni, oluholwa yiNkosi Mduduzi kaVimbeni ka-Amos kaMudliwamafa Shembe, abese begxumeke amatende abo endleleni obekuzodlula kuyona abaseKuphakameni, yize inkantolo ikhiphe umyalelo wokuba kube yibona abakhuphukela entabeni kuqala.
Lezi zindaba zivezwe nguMvangeli Thetha Ngiba okhulumela uhlangothi lwaseKuphakameni, othe basola amaphoyisa ngokungaqinisekisi ukuthi kakukho muntu ozothikameza uhambo lwabo. Uthi lokhu kuyabakhathaza ngoba nangonyaka ophelile kwenzeke okufanayo, kwagcina kubaphoqa ukuba bashintshe indlela abebezohamba ngayo ngoba bebalekela umsindo.
“Le nto iyasikhathaza kakhulu ngoba nangonyaka ophelile kwenzeke okufanayo. Kuyimanje sithole umbiko othi kunamalungu aseBuhleni asegxumeke amatende awo kwaSimamane lapho sizodlula khona.
"Kasazi ukuthi lokhu kwenzeke kanjani ngoba kuyaziwa ukuthi yithina okumele sikhuphuke ngoLwesibili bese bona belandela ngoLwesithathu.
"Ngesikhathi lokhu kwenzeka nyakenye, kuze kwadingeka ukuba amaphoyisa asincenge ukuba siyishintshe indlela esizohamba ngayo ngoba egwema umsindo. Lokhu kusiphathe kabi kodwa sagcina silandele umyalelo wawo sayishintsha indlela ngoba sifuna ukuthula.
"Kuyasethusa-ke uma nakulo nyaka kuzokwenzeka okufanayo ngoba amaphoyisa bekumele aqaphe ukuthi kabekho yini asebelinde lapho sizodlula khona,” kusho yena.
Uthi lokhu bakusho ngoba bayazi ukuthi kungadala ingxabano kubantu kugcine kusuka umsindo ongenasidingo futhi obungagwemeka. Uhambo beluholwa yiyona uqobo iNkosi Vukile edume ngeleNcoyincoyi emaNazaretheni, ukuyihlonipha.
Ezokuphepha beziqinile njengoba amaphoyisa abelokhu ehamba phambili amanye engemuva ukuqapha isimo. Nabezimo eziphuthumayo bebekhishiwe njengoba izimoto bezibonakala zilandela inqwaba yabantu ebihamba ihlabelela izihlabelelo zamaNazaretha abanye beshaya izigubhu kufuthwa namacilongo, bengakunakile ukushisa kwelanga.
Izolo ngoLwesithathu abaseBuhleni baqale olwabo uhambo belibangise eNtabeni iKhenana, oZwathini khona belu eNdwedwe. Uhambo lwaseKhenana luqale emuva kokuba kukhothame iNkosi Vimbeni ezala iNkosi Mduduzi njengoba uhlangothi lwaseBuhleni luqhekezeke phakathi kwasunguleka olwaseThembezinhle obeluholwa yiNkosi Vela kaGalile kaMudliwamafa Shembe okhothame ngoZibandlela (December) nyakenye.
Isikhundla seNkosi Vela ebiyaziwa ngeleMisebeyelanga, kumanje siphethwe ngumfowabo, iNkosi Phinda.
Okhulumela amaphoyisa KwaZulu-Natal, uCol Thembeka Mbhele, uthi amaphoyisa kawakwazi ukususa abantu ababeke amatende abo uma ingekho incwadi yasenkantolo egunyaza ukuba basuswe. Uthi uma ikhona, bekumele abaseKuphakameni bavule icala emaphoyiseni ukuze ezongenelela.