UDLWENGULWE PHAMBI KWESIDUMBU SESOKA
EZOMPHAKATHI: Kudlwengulwe owesifazane phambi kwesidumbu sesoka
USASHAQEKILE umphakathi wasePalestine, eMaoti, enyakatho yeTheku emuva kwesigameko sangoLwesine ekuseni lapho kudutshulwe kwabulawa owesilisa maqede kwadlwengulwa isinqandamathe sakhe abenaso endlini.
Lesi sigameso sishiye umphakathi wakule ndawo uthukile futhi ukhungathekile njengoba abasolwa kuthiwa ngabantu basendaweni kanti namanje basagcwele amathafa.
ILANGA lithole ngomthombo walo ukuthi abasolwa abayisi-7 bangene endlini kaMnu Zamani Ngoma (29) ngenhloso yokubamba inkuzi kodwa umufi wabahlula ngamandla baphuma babaleka.
Kuthiwa emuva kwesikhathi bebalekile, babuye sebehlome ngesibhamu. Ngokuthola kweLANGA, bafike badubula uMnu Ngoma badlwengula isinqandamathe sakhe - ILANGA elinalo igama laso - maqede basidubula engalweni.
Umthombo uthi abasolwa bathathe omakhalekhukhwini, umsakazo nezinye izimpahla endlini bashaya bachitha. Lokhu sekwenze umphakathi wakule ndawo wahlala uthukile njengoba kungaziwa noma abasolwa bazobuya bazogadla yini nakomakhelwane.
“Laba bafana bafike kulo muzi bezitshela ukuthi bazokwenza abakuthandayo bathathe impahla. Sebengaphakathi, behlulekile wukukwenza lokho umufi wabahlula ngamandla, babaleka.
“Ngokunganaki, umufi akazange abikele muntu kanti abasolwa bazobuya sebehlome ngesibhamu. Bafike bamdubula amahlandla amathathu, esisiwini, esifubeni nasonyaweni. Ushonele khona lapho endlini.
“Baphendukele intombazane ebisendlini kwenzeka lokhu, bayidlwengula isidumbu sikaMnu Ngoma sidindilize. Bathe sebeqedile bayidubula engalweni maqede bathatha izimpahla endlini, okubalwa omakhalekhukhwini nezinye izimpahla zasendlini, bashaya bachitha nazo,” kusho umthombo.
Elinye ilungu lomphakathi elingeke lidalulwe ukulivikela, lithi namanje basathukile ngenxa yalesi sigameko. Lithe selokhu kwenzeke lesi sigameko abantu sebesheshe bazivalele ezindlini, ngisho emgwaqweni kuyathuleka ebusuku.
“Ngelanga lesigameko kasizange sizwe kuqhuma isibhamu kodwa intombazane ifike izongqongqoza entathakusa icela usizo, ifike yacela ukushayela amaphoyisa ngoba ibilimele nayo engalweni yasitshela ukuthi sebehlaselwe ngabantu.
“Ithinte amaphoyisa sabe sesibheka umonakalo njengomakhelwane. Sifike endlini sekuvele konakele ngoba umphefumulo ubusuvele uphumile kumufi, engasanyakazi.
“Ubephuma igazi emzimbeni kanti endlini izimpahla bezisakazeke yonke indawo, kubonakala ukuthi bekuliwa.
“Selokhu ngaba khona emhlabeni, bengiqala ukubona isihluku esinjena kubulawa umuntu endlini yakhe elele nentombi yakhe.
“Kuyimanje kangikabi kahle emphefumulweni, ngisathukile kanti ngisho nabanye abantu esihlala nabo endaweni basathukile,” kusho leli lungu lomphakathi.
Lithi siyaqala ukwenzeka isigameko esinjengalesi endaweni kanti liyacabanga ukuthi abantu abenze lokhu yigenge ezidlela izidakamzwa.
Okhulumela amaphoyisa KwaZulu-Natal, uCol Nqobile Gwala, usiqinisekisile lesi sigameko wathi amaphoyisa asaphenya, bekungakaboshwa muntu.