BASHAYANE BALUMANA ABADLALI BAWE-NFD
IBHOLA: Angase abhekane nokuqondiswa izigwegwe umsusi wodweshu
ANGASE abhekane nolaka lwePremier Soccer League (PSL) umdlali woThongathi FC osolwa ngokugebhula ngezinyo umdlali weRichards Bay FC ngemuva kokuba behlephulane ngequpha.
IRichards Bay FC iguqise ngo-21 uThongathi koweNational First Division (NFD) ngoMgqibelo ntambama ePrincess Magogo Stadium, KwaMashu.
Amagoli eRichards Bay ashaywe ngoMenzi Hlophe noS’phelele Mkhulise, eloThongathi lashaywa nguSiyabonga Vilane.
Lo mdlalo kubikwa ukuthi uke waba nezigemegeme ezingavumelekile ebholeni uPhilani Gumede odlala emuva kuThongathi ehlephulana ngequpha noHlophe ongumgadli weBay. Bakhishwe ngamakhadi abomvu.
Kuthiwa emuva kokuba bekhishiwe impi iqhubekile ngasezindlini zokushintshela uGumede ucele ukukhuluma noHlophe.
Kuthiwa uHlophe uye ngokukhulu ukunganaki ezitshela ukuthi bazokhuluma kodwa uGumede wamugibela ngesibhakela babe sebehlephulana ngequpha.
Kuthiwa uGumede ngendlela abedinwe ngayo uze waluma uHlophe ekhwapheni.
Kuthiwa abaqaphi bodweshu bazamile ukuhlukanisa laba badlali uGumede engalawuleki, esho ukumqeda uHlophe.
Kuthiwa uHlophe uze wabalekiswa uGumede esho ukumqeda.
Kwenzeka sonke lesi sigameko nje kuthiwa u- match commisioner ubebukela ebhala phansi ethatha i- video nezithombe.
Kuthiwa uthathe nezithombe lapho uHlophe elunywe khona nasemlomeni njengoba kuthiwa ubelimele.
Leli phephandaba lithole ukuthi u- match commisioner usewu- thumele umbiko ohambisana nezithombe ne- video kwiPSL okulindeleke ukuba ubhekwe yikomidi eliqondisa izigwegwe.
Leli phephandaba lithinta uSolwazi uRonnie Schloss iChief Operations Officer yePSL uthi yonke imibiko yonondweba izofundwa namuhla ngoMsombuluko.
Khonamanjalo, uThongathi lusayinise uPhilani “Maoti” Shange ozakhele udumo egijima kwiLamontville Golden Arrows noMadoda Motha oke wadlala kwiMpumalanga Black Aces.
Laba badlali bajoyina uLucky Mzizi naye osayine kuThongathi oke wadlala kwiKaizer Chiefs.
Kuzo ezeNFD, uDavid Booysen oke wagijima kwiMaritzburg United usesayine kuBuntu Cape Town FC edlala kwiNFD.
Isiyonke imiphumela yemidlalo yeNFD ebingempelasonto ihambe kanje:- Super Eagles 0, Highlands Park 3; Ubuntu 2, Spurs 1; CPT Town All Stars 2, Mthatha 2; Eagles 3, Mbombela 4; Stellenbosch 0, Tshakuma 2; Leopards 4, Tuks 0; Real Kings 1, Cosmos 0.