Ugonyuluka ngobuhlungu uShenge
EZEPOLITIKI: "Kunezinkulumo ezithi mina nginemizamo yokulimaza iSilo"
UMNTWANA waKwaPhindangene, iNkosi Mangosuthu Buthelezi, uthi iSilo uZwelithini kaBhekuzulu sikhululekile ukukhetha undunankuku waso uma ngabe indima yakhe kulesi sikhundla ingasadingeki.
Usho la mazwi ashaqisayo ephendula izinkulumo athi zivela kwabathile eNdlunkulu kaZulu ezimgxekayo, zithi ubesiphethe ngesandla sensimbi iSilo ngesikhathi esahola uhulumeni waKwaZulu - abengundunankulu wawo.
Umntwana kuvela ukuthi ukhulume waze wahlengezela izinyembezi echaza ngobuhlungu abuzwayo ngalezi zinkulumo. Usho la mazwi emcimbini wokugubha iminyaka engama-46 iSilo sisesihlalweni, obusesigodlweni saso KwaKhethomthandayo, mhla zili-15 kuZibandlela (December) nyakenye.
INkosi yakwaButhelezi ilande umlando omude ngomsebenzi ewenzile neqembu engumengameli walo, iNkatha Freedom Party (IFP), ukuqinisekisa ukuvikeleka kobukhosi bukaZulu nesikhundla seSilo kusukela ngesikhathi sibekwa esihlalweni. Ibalule nokuzikhandla kwayo iwa ivuka iminyaka eminingi, isebenzela ukuba kubhalwe esakhiweni somthethosikelo wezwe ukuthi ikhona indawo yesikhundla sobungonyama.
Ithe imizamo yayo kayibanga yimpumelelo ngenxa kahulumeni we-African National Congress (ANC) obuyishaya indiva kusukela umengameli kusenguMnu Nelson Mandela kuze kufike kuMengameli Jacob Zuma.
“Sengikwenze konke okusemandleni ami ukuqinisekisa ukuthi lokho kwenzeke, kakwenzeki, kodwa ngizwa sengathi ngibhukuda emfuleni ongenisayo,” kusho iNkosi Buthelezi. Kangikwazi ukufihla ukungeneliseki kwami lapho ngizwa khona ukukhuluma esigodlweni kokuthi mina nohulumeni waKwaZulu sake savalela, sabopha iSilo ejele, ungcono uMandela owayesejele.
"Lokho kuyakuba yisilonda enhliziyweni yami ngize ngiyoku- fa ngoba ngiyazi ngikwenze konke okusemandleni ukuvuselela ubukhosi bakwethu ukuba bube yilokhu obuyikho kumanje noma bungakafiki endaweni engangifisa bube kuyona. “Izinkulumo zize zifike lapho zithi mina Mangosuthu Buthelezi nginemizamo yokulimaza iSilo sami.
"Ngiyazi ukuthi zonke lezi zinto engibhecwa ngazo zikhona lapha ngaphakathi esigodlweni. Sengiqhubekile ukusebenzela iNgonyama yami, abantu balesi sizwe, ngisho nabantu baseNingizimu Afrika, ngilokhu nginalesi silungulela enhliziyweni yami. Nginobizo kunembeza wami ukukhipha le nto ngaphambi kwezinsuku zami ezisasele ngoba sezisondele,” kusho yena.
“Ngiyabona ukuthi amazwi ami anamuhla kungahle ashaye inothi elingehli kahle kodwa ngiyazi isikhathi sami emhlabeni ukuthi sesiya ngokuncweleka. Ngingeke ngikwazi ukuma ngaphambi koMdali wami ngaphandle kokuba ngisho izinto ese-ngizishilo na-muhla. "Kangikwazi ukuthola ukuthula nxa lezi zinto zihlala zingaxazululiwe. Kangikwazi ukuvumela ukuba lezi zinto zihlale zihluthulelwe ngaphakathi kwenhliziyo yami lapho isidumbu sami sesehliselwa endaweni yami yokugcina! Ngisho namanje esikuzuzile ngesikhathi esedlule kuyabhidlizwa.
"Khona nje sithole izindaba zokuthi iphaneli esungulwe ngumengameli waphambilini (uMnu Kgalema) Motlanthe isinqume ukuba Ingonyama Trust Act iqedwe noma ichitshiyelwe. Lona kwakuwumthetho wokugcina engawufaka eSisha- yamthetho saKwaZulu ukuvikela abantu ukuba bangalahlekelwa wumhlaba phansi komniniso iSilo kodwa uKhongolose ezingqungqutheleni zawo, usunqume ukuthi Ingonyama Trust Act kufanele yesulwe.”
INkosi Buthelezi iphethe ngokuthi kwaba yiSilo uCyprian Bhekuzulu esayethwesa umthwalo wokuba ibe ngundunankulu waso womdabu. Ithi isike yakuphindaphinda ukuthi iNgonyama ikhululekile ukukhetha undunankulu wayo uma ngabe indima yayo ingasadingeki kunokuba kwenziwe sengathi yazibeka yona.
ILANGA lithole ukuthi njengoba izolo ngeSonto ubuholi obusha beANC bebuyokotha iSilo - buholwa ngumengameli waleli qembu, uMnu Cyril Ramaphosa - iNkosi Buthelezi kayitshelwanga njengondunankulu kaZulu, ize yezwa ngosizwile.
Okhulumela iNdlunkulu kaZulu, uMntwana Thulani Zulu, ebuzwa ngokungaziswa kukaMntwana ngalo mcimbi, uthe akwaziyo wukuthi yi-ANC ecele ukubona iSilo. Uthe lona bekungewona umcimbi ohlelwe yiSilo, abantu abebekuwona bebengamenywanga yiSilo, bazifikele.
“Ngiyafika nje ngiphuma eGoli, kangazi lutho. Ngicela nithinte uMntwana uMbonisi Zulu kusho yena.
ILANGA lizamile ukuxhumana noMntwana uMbonisi kodwa ucingo lwakhe belungangeni. UNkk Khusela Sangoni okhulumela i-ANC kuzwelonke, uthe beyi-ANC kabakwazi ukuphawula ngalolu daba futhi kabangeni kulona.