Kuboshwe amaphoyisa asolwa ngokweba
EZOMPHAKATHI: Kuduke izimpahla esiteshini
UMKHONTO ugwaze ekhaya ngoLwesine kuboshwa amaphoyisa amathathu asesiteshini saseMkhuze, enyakatho-mpumalanga yeKwaZulu-Natal, ngecala lokweba. Kubikwa ukuthi la maphoyisa aboshwa nje, bekunophenyo lwangaphakathi obeluqhubeka emuva kokuba kuduke izimphahla ebezigcinwe njengobufakazi kulesi siteshi.
Umthombo weLANGA osembuthweni wamaphoyisa, uthi kuvame ukuthi amaphoyisa abambe izimpahla ezingena ngokungemthetho eNingizimu Afrika kanti awaseMkhuze kukhona azibambile zisuka eMozambique.
“Ngokujwayelekile emaphoyiseni lezi zimpahla zibizwa ngamabhele, zithathiwe zayogcinwa esiteshini saseMkhuze kodwa kwahamba isikhathi zanyamalala. Kuqalwe uphenyo lwangaphaka- thi esiteshini olugcine luholele ekubeni kuboshwe amaphoyisa amathathu asolwayo,” kusho umthombo.
Okhulumela amaphoyisa KwaZulu-Natal, uCol Thembeka Mbhele, uthi icala kaliyiswanga enka-ntolo ngenxa yokungatholakali kobufazi.
Khonamanjalo, kusabatshazwa ihlazo lokuntshontshwa kwemoto isephawondini yamaphoyisa eSikhawini, eMpangeni enyakathompumalanga yeKwaZulu-Natal ngoZibandlela (December) nyakenye.
Kuthiwa kakugcinanga lapho kodwa kuphinde kwakhishwa nenye imoto amathayi ipakwe ngaphakathi ephawondini yamaphoyisa, okuthiwa isondelene nesiteshi samaphoyisa.
Umthombo weLANGA ongaphakathi emaphoyiseni uthe kusolwa isandla sangaphakathi kulobu bugebengu. Umthombo uthi okuxakayo wukuthi yisiphi isigebengu esingaba nesibindi sokungena ephawondini yamaphoyisa sintshontshe imoto ekubeni isondelene kakhulu nesiteshi.
“Le nto iyasolisa impela, kakukwazi ukuthi kungasuka izigebe- ngu zingene endaweni yamaphoyisa ziyokweba imoto namathayi ekubeni zazi ukuthi le ndawo isesiteshini samaphoyisa. Kuyasolisa ukuthi kunomuntu noma abantu izigebengu ebezisebenzisana nabo ngaphakathi.
“Wona amathayi akhishiwe aphume kanjani kungaboni muntu? Uma ukulesi siteshi samaphoyisa, uyakwazi ukubona lapho kugcinwe khona izimoto, yingakho kunezinsolo zokuthi lezi zigebengu kukhona obezihlebele wazinikeza yonke imininingwane, yingakho zingene zaze zaphuma nemoto kungekho ozibonayo,” kusho umthombo.
UCol Mbhele uthi kakulula ukuthola ukuthi leli cala livuliwe yini ngoba kakwazeki ukuthi livulwe nini. Iphoyisa elingagunyaziwe ukukhuluma nabezindaba lithi likhona icala lokwebiwa kwemoto nelokwebiwa kwempahla elivuliwe kodwa kakukaboshwa muntu.