ILANGA LIHLABENE NGOQWEQWE
USEQOKELWE kwesokuba nguMhleli Omkhulu weLANGA, uMnu Philani Mgwaba, osemnkantshubomvu kwezokuhlelwa kwamaphephandaba.
Ephawula ngokubekwa kwakhe uthe ujabula kakhulu ukuthola ithuba lokubamba iqhaza kuleli phephandaba elasungulwa nguDkt John Langalibalele “Mafukuzela” Dube ngowe-1903.
“Lona wumlando omuhle kakhulu okufanele siziqhenye ngawo njengabantu baKwaZulu-Natal nabaseNingizimu Afrika yonkana,” kusho uMnu Mgwaba.
Lo makadebona emkhakheni wezindaba, ube ngumhleli wokuqala wephephandaba lesiZulu, iSolezwe ngowezi-2002. Uthembisa ukuthi kunezinguquko ezizokwenziwa ezizojabulisa abafundi beLANGA.
“Emuva kweminyaka embalwa ngisebenzela eGoli, ngiyajabula ukubuyela ekhaya ngibambe iqhaza ekufukuleni abantu besifundazwe engisikhonze kakhulu,” kusho yena.
UMnu Mgwaba uke waphatha la maphephandaba alandelayo njengomhleli: iPretoria News, iSunday Tribune neThe Mercury wonke angaphansi kwenkampani i-Independent Newspapers.
Eminyakeni emithathu nengxenye edlule, ubeyinhloko yeTimes Media, (manje esibizwa ngeTiso Blackstar Pty Ltd) KwaZulu-Natal - amanye amaphephandaba ayo yiSunday Times, yiBusiness Day neSowetan.
UMnu Mgwaba ongowokudabuka KwaZulu-Natal, ubesezinze eGoli lapho ebengumhleli omkhulu weSowetan neSunday World, abuye futhi abe ngumqondisi weTiso Blackstar Pty Ltd - ephethe la maphephandaba.
Uthole iziqu zeBA kwiHistory ne-African Politics e-University of South Africa nezeMaster’s kwi- Classical Culture, eStellenbosch University, eWestern Cape. Ephawula ngokubamba lo fishi omkhulu, uMnu Arthur Konigkramer, ongumqondisi omkhulu we
LANGA, uthe: “Kasingabazi nakancane ukuthi (uMnu Mgwaba) uzokwazi ukukhuphula ILANGA alibeke ezingeni elilifanele.
“Ulandela ezinyathelweni zabanye omakadebona kwezobuntatheli asebeke babayingxenye yaleli phephandaba, okubalwa kuzona uRRR Dhlomo, uHE Dhlomo, uNat Nakasa noJordan Ngubane,” kusho uMnu Konigkramer.