Uthukile enzelwa umcimbi wosuku lokuzalwa
ISILOMO sikaDJ esingaconsi phansi kubathandi bobumnandi sigubhe usuku lwaso lokuzalwa singazelele ehhotela iRiverside, eThekwini ngoLwesihlanu.
UHappy “DJ Happygal” Ndlovu umangazwe ngobhululu bakhe engalindele ngesikhathi bemenzela isiphihli somcimbi obuhanjelwe yilabo asondelene nabo.
ILANGA belimenyiwe kulo mcimbi obuyisipesheli obekumenywe abekhethelo kuphela njengoba lo DJ ebengazi.
UHappygal uzalwa ngomhla zi-31 kuZibandlela kodwa ngenxa yokuthi ubematasa ngalolu suku abangani nalabo asondelene nabo bakhethe ukumenzela umcimbi ngoLwesihlanu njengoba bekuwusuku abeziphumelele ngalo selokhu kuqale amaholidi kaZibandlela.
UHappygal utheleke kuleli hhotela ezozidlela isidlo sasemi- ni kodwa uthuke wacishe washayeka phansi ngesikhathi efica obhululu bakhe bemhlelele lo mcimbi.
Omunye wabangani bakhe obehamba phambili ekuhleleni lo mcimbi uPhelo Mhlongo uveze ukuthi kube nzima ukuhlela lo mcimbi kaHappygal njengoba konke kwenzeke ngesikhathi esincane.
Uncome ubumnene bukaHappygal nokumenze wasukumela phezulu ehlela lo mcimbi.
“UHappygal ungomunye wabantu abanenhliziyo enhle futhi uyabakhathalela abantu ngakho ngibone kungcono ukuthi sihlangane njengabangani bakhe simenzele lo mcimbi nakuba yena ebengazi ngawo.
"Ungomunye wabantu abakhuthele kulo mkhakha futhi uyazimisela kwakwenzayo ngakho ngalo mcimbi sithi njengabangani bakhe siyambonga futhi simfisela okuhle kodwa njengoba kuqala unyaka,” kusho uPhelo.
Phakathi kobhululu bakaHa- ppygal abebekhona kulo mcimbi kubalwa uDJ Cndo ongomunye woDJ besifazane abavule indlela eThekwini, uThandeka Zulu wodumo lomdlalo wochungechunge Uzalo obedlala indawo kaNombuso, uTha Simelane onguNontandakubukwa weTheku, uDJ Sjerere, uJacinta Ngobese oke waba ngumsakazi weGagasi, uDJ Boonu, uSabelo Ngema oyilungu le-AfroSoul, uMdu Ngcobo ongumhleli womcimbi waminyaka yonke iHazelmere Jazz Festival nabanye abasondelene nalo DJ.
UHappygal ubonge abangani bakhe ngokumenzela lo mcimbi.
“Bengingazi ukuthi uthando eninalo lungaka ,ngiyabonga kakhulu sengathi uNkulunkulu anganibusisa.
"Ngiyaqala ngqa ukwenzelwa umcimbi wosuku lokuzalwa ngakho lokhu kusho lukhulu kimina,” kubonga lo DJ onengoma edlalwa kakhulu emsakazweni kulezi zinsuku esihloko sithi “Ukuphila”.