Kazisezwani izisebenzi kulahleka eyesitokofela
Uyedwa obenesikhiye sesisefo
KUPHAZAMISEKE ukusebenza ePrince Mshiyeni Memorial Hospital, eMlaza, ngesikhathi abahlengikazi bexabana mayelana nokulahleka kwemali elinganiselwa ku-R100 000 yesitokofela ebesidlalwa ngaphakathi esibhedlela.
Kuzokhumbuleka ukuthi ngoZibandlela (December) nyakenye, ILANGA libikile ngokulahleka kwale mali. Kutholakale mhla zili16 kuZibandlela ukuthi ilahlekile esisefweni okuthiwa ibibekwa kusona nguNkk Jennifer Mhlongo, obengumgcinimafa wesitofela.
Laba bahlengikazi abasebenzela egunjini lasebebelethile, kuvela ukuthi kugcine kuphoqeleka ukuba bahlukaniswe, basebenze ngokwehlukana njengoba bekungasasebenzeki kubangwa le mali.
UNkk Mhlongo ugcine ekhishiwe kuleli gumbi wayosebenzela kwelinye elibizwa ngeD1 ngoba abanye abahlengikazi bebesho ukumudla bamfele, beyifuna la imali yabo. Kuthiwa bebesho nokusho ukuthi ngeke bakwazi ukusebenza uma engakabaniki imali yabo.
Ekhuluma neLANGA omunye umhlengikazi - obeyingxenye yalesi sitokofela - ongathandanga ukuba igama lakhe livezwe, uthe kakusasebenzeki ngenxa yokulahleka kwale mali. “Ngikhuluma nje omunye uzakwethu ulaliswe esibhedlela ngenxa yengcindezi yokulahleka kwemali. Emsebenzini sekumuncu nje, siyasola ukuthi le mali kayilahlekanga kodwa idliwe.
"Okwenza sisho kanjena wukuthi kunabanye ozakwethu esithi noma siyikhuluma le ndaba, bamkhulumele (lo obegcina imali), bangafuni nokuthi athintwe. Bathi masisale sesimyeka,” kusho lo mhlengikazi. UNkk Mhlongo kuthi- wa nguyena kuphela obenesikhiye sesisefo obekuhlala kusona imali, okuthe uma befika mhla zili-16 kuZibandlela bafica itshe lome inhlama - bekufanele sihlukaniswe mhla zili-18 kuyena uZi- bandlela. Kuthiwa bafice isisefo sivuliwe, hhayi sigqekeziwe.
“Lesi sisefo besivumelane ngokuthi imali siyibeke kusona ngoba siyasazi ukuthi kasigqekezeki. Yile nhlobo endaba eqinile futhi nengidi yakhona kawukwazi ukuvele uyivule nje, ngisho nokuyisaha kakulula. Sibe sesithinta uNkk Mhlongo sibuza ukuthi sivulwe yini isisefo, wathi akazange asivule uma sivuliwe kusho ukuthi sigqekeziwe. Simcelile ukuba aphuthume emsebenzini azozibonela njengoba ubengasebenzi ngalelo langa. Simbize ngehora lesi-7 ekuseni kodwa waze wafika ngelesihlanu ntambama.
"Uma esefika uvele wazithela ngabandayo wathi uyabona ukuthi kugqekeziwe manje yini okufanele ayenze. Omunye uzakwethu uze wabhoka ngolaka wathi mabahambe bayovula icala. Uma amaphoyisa esefika ezobhala isitatimende, ambuzile ukuthi ukhona yini onesipele sikakhiye wesisefo ngoba kasigqekeziwe, sivuliwe, wathi akekho futhi nokhiye kawu- kaze uduke,” kusho lo mhlengikazi. Uthi kuyacaca ukuthi umuntu othathe le mali yabo ubenokhiye abangazi ukuthi angawuthatha kuphi engaxhumananga noNkk Mhlongo. “Usevele abhoke ngolaka uma sikhuluma ngale mali, ngikhuluma nje usevulele omunye uzakwethu icala lokumesabisa,” kusho lo mhlengikazi.
Ethintwa yiLANGA uNkk Mhlongo, uthe isisefo sakhe sigqekeziwe kwashaqwa imali yesitokofela. Uma ebuzwa ukuthi ithathwe kanjani, uvele wathi kuthiwe angabe esakhuluma lutho njengoba udaba selusemaphoyiseni azoziphenyela wona ngendlela yawo. “Uma ngilokhu ngikhuluma ngizophazamisa uphenyo lwamaphoyisa, ngicela ungixolele,” kusho uNkk Mhlongo.
Okhulumela amaphoyisa KwaZulu-Natal, uLt Colonel Thulani Zwane, uthi amaphoyisa aseMlazi aphenya udaba lokuntshontshwa kwemali yesitokofela. Okwamanje bekungakaboshwa muntu.
Okhulumela uMnyango wezeMpilo KwaZulu-Natal, uNkz Ncumisa Mafunda, uthi bewumnyango bazisiwe ngokungaboni ngasolinye phakathi kwezisebenzi zawo zibanga izinto ebezizenza eceleni, umnyango ngeke uphawule kuzona.
“Nakuba kunjalo, umnyango ungenelile ngokususa esinye sezisebenzi safakwa kwenye iwodi ukuxazulula inkinga. Kawukho umbiko esiwutholile ngokuphazamiseka kokusebenza ngoba udaba lusheshe lwaxazululwa,” kusho uNkz Mafunda.