Kushubile kumasipala owephucwe izimoto
Imfucuza ayisathuthwa
ZIMAPEKETWANE izinto kuMasipala waseDumbe, enyakatho yeKwaZulu-Natal emuva kokuphucwa izimoto eziyi-6 ebeziqashiwe yilo masipala enkampanini ezimele ngenxa yokuthi bezingasakhokhelwa.
Lezi zimoto okubalwa kuzona amaloli athutha imfucuza namaveni abesebenza eminyangweni eyahlukene kulo masipala, zithathwe ngoZibandlela (December) nyakanye.
Selokhu zithathiwe, idolobha laseDumbe linuka phu wukungcola. Esinye isakhamuzi saseDumbe, uMnu Sibusiso Mkhabela, sithi sebeze bamba imigodi emagcekeni lapho beshisa khona imfucuza kwazise umasipala kawusayi nhlobo ukuyolanda udoti emalokishini.
“Abakwamasipala kabakaze futhi beze kithina ukuzosichazela ukuthi kungani bengasezi ukuzolanda imfucuza, sibona ukuthi yingoba kabanandaba nabantu baseDumbe.
“Edolobheni ngoKhisimusi udoti ubusuthuthwa ngumnikazi wegalaji ngeveni lakhe ayowulahla. Lo mnikazi wegalaji kuhambe naye wakhathala njengoba ebengatholi ngisho indibilishi ngokusiza umasipala.
“Sicela uNgqongqoshe Nomusa Dube-Ncube angenelele, kungenjalo iDumbe izofa fi. Kwamanje sifile wukuthi amahhovisi asavuliwe, kawakavalwa,” kusho uMnu Mkhabela.
Lo masipala kuzokhumbuleka ukuthi ILANGA like labika ngawo ukuthi zonke izimoto obunazo ebezili-18 ngaleso sikhathi ubuziqashile, uzikhokhela u-R380 000 ngenyanga kodwa okuthe sewuxakwa wukushoda kwemali, ezili-12 zaphindiselwa emuva kwasala ezi- yisi-6 ebesezikhokhelwa u-R163 000 ngenyanga.
Ikhuluma neLANGA iMeya yaseDumbe, uMnu Majuba Mavuso, ithe kuyiqiniso ukuthi izimoto zabo zithathiwe. Uthi ngokwesivumelwano abebenaso nenkampani ebibaqashisela ngezimoto, bebekhokha mhla zintathu njalo ngenyanga kodwa kuthe lulunye babona sekungena abantu beyolanda lezi zimoto.
“Sithe sithi sizama ukukhuluma nabo bathi kabazimisele ukukhuluma nathi, masibayise enkantolo uma sithanda. Icala lizongena ngoNhlolanja (February) ngenyanga ezayo.
“Sisola ukuthi kukhona abantu abadlala ipolitiki kulolu daba njenjoba ngosuku ezithathwe ngalo, abashayeli bethu babuye nezimoto bengalivala ibhuku lazo, bashiya okhiye ezimotweni bagoduka, into engakaze yenzeke nakwamadala eJudeni.
Nakuba kunjalo, sikwazile ukuthola iloli elilodwa elinikelwe wumnyango wezokuthutha okuyilo esilisebenzisayo njengamanje. Yize lingenele kodwa liyawenza umehluko,” kusho uMnu Mavuso.
Edolobheni ngoKhisimusi udoti ubusuthuthwa ngumnikazi wegalaji...