LUMDALELE AMAZINYO ABUSHELELEZI UHLELO LWAKHE OWOTHANDO NES'THEMBU
UGONYULUKA ngobunzima bempilo yakhe usomabhizinisi waKwaMadlala KwaSilwane ogwini oluseningizimu yeKwaZulu-Natal, uMnu Musa Mseleku wodumo Uthando Nes'thembu - okuwuhlelo obelukhonjiswa ku-161 kwiDStv olubuya isibili ngoLwesine.
UMnu Mseleku uthi ngenxa yokuphumelela kwakhe sekunamalungu omndeni wakhe angalubhadi nokulubhada kwakhe ngoba kunezinsolo zokuthi uthwele.
Lokhu ukusho engxoxweni ekhethekile neLANGA ngoLwesihlanu. Lo somabhizinisi uzakhele udumo nabalandeli ngonyaka odlule njengoba engumnikazi nongqondongqondo woThando Nes'thembu, olukhuluma ngempilo yakhe namakhosikazi akhe amane.
Lo somabhizinisi othi impilo yakhe nomndeni wakhe uyithatha njengomhlatshelo njengoba evulele amakhamera ngempilo yesithembu - ngoba ethi ufisa - ukufundisa nokuxwayisa ngesithembu kwazise abaningi banemibono engeyona ngaso.
“Kuthathe isikhathi ukuthi amakhosikazi ami akwamukele lokhu ebengifisa sikwenze (ukuma phambi kwamakhamera). Ngingasho ngingananazi futhi ukuthi kangizisoli nakancane ngalesi sinqumo ngoba ngiyaqonda ukuthi vele ngeke kubemnandi zikhathi zonke.
“Yingakho ngithi lokhu esikwenzile kuyafana nokuthi kuwumhlatshelo,” kusho yena. Uthi ukuphumelela kwakhe kumdalele amazinyo abushelelezi ngisho nasezihlotsheni zakhe imbala njengoba kukhona esezifunge zagomela zathi kazisoze zalubhada emzini wakhe ngoba zisaba ukuthi uthwele.
“Kangazi-ke noma yingoba besaba ukuthi ngizothwala ngabo yini uma becabanga ukuthi ngithwele. Abanye baze bangafundi bayeke isikole kuthi uma bengaphumeleli kukhonjwe mina. Kubalulekile ukuthi uma singabantu singasabi ukukhuluma nokumela amaqiniso empilo.
“Mina kanginayo into engisabayo ukuyikhuluma ngoba ngithi iyihlazo. Iqiniso yiqiniso. Ngangingeke ngibe nesithembu ukube ngangingeyena umuntu ozwana neqiniso ngoba esithenjini kufuneka iqiniso ngaso sonke isikhathi, ngale kwalokho kakukho okungaphumelela,” kusho yena.
Uthi unezingane ezili-10 kanti angathanda ukusheshe azithole nalezi ezinye angaze abe mdala kakhulu, agcine engasakwazi ukuzikhulisela. Ngaphambi kokuphela konyaka odlule, leli phephandaba like lapotshozelwa yimithombo yalo ethembekile nesondelene nalo mndeni ukuthi kunezinsolo zokuthi useqalile ukuqalaza inkosikazi yesihlanu.
Ngawo unyaka odlule leli phephandaba limbuzile uMnu Mseleku ngalezi zinsolo waphika wama ngentaba. Selizifikele emzini wakhe, liphinde layivusa le nkulumo yangonyaka odlule nakhona wacacisa nje ukuthi malikhohlwe, angeke akhulume ngalezo zindaba.
Liqhubekile lamhlala entanyeni wagcina egobe uphondo, waveza ukuthi cha noma engakaqali ukubheka kepha unazo izinhlelo zokuthatha futhi noma engafunanga ukuveza ukuthi lowo kuyobe sekungowokugcina yini noma naye usayolanywa.
Uthi kukhona okunye okwenzekayo okungamphathi kahle, okumenza abone sengathi abantu abaningi kabafundisekile kahle ngesithembu.
“Kunabantu, ikakhulukazi besifazane abacabanga ukuthi isithembu yindawo yokuqeda inhlupheko, cha, kakunjalo. Isithembu siyafana nobudlelwano bonke, kumele simiswe wuthando kuqala ngaphambi kwezinye izinto.
“Ngiyaye ngibone-ke ukuthi kusenabesifazane ababona owesilisa ome kahle besebefuna ukushada naye noma ngabe unamakhosikazi ngoba bona bebona indlela yokuphuma osizini.
“Kukhona abesifazane asebehlulwe yimishado bese becabanga ukuthi bazongena esithenjini nje ngoba kukhona le nto ebusa abantu abaningi ukuthi siwumshado ongenaso isigqi njengeminye,” kusho yena.
Kuzokhumbuleka ukuthi ngemuva kokuqala kohlelo lwakhe kumabonakude, uMnu Mseleku uke wakhala ngabesifazane abebezibika kuyena kwaphinde kwaba namahlebezi okuthi uthi akabafuni nje abesifazane asebezele.
“Ngiyafa bo wukushelwa ngabesifazane abaxakekile, abafuna ukuphuma osizini ngami. Nami ngiyafisa nje ukushelwa ngabesifazane abazisebenzelayo abame kahle, abangaxakekile.
“Lokhu kakusho ukuthi ngizothandana nabo, cha kepha ngizama ukuchaza ukuthi nabo abesifazane abami kahle, abafundile nabazisebenzela kahle bangangena esithenjini.
“Mina nje amakhosikazi ami kawashadanga nami ngoba exakekile, angabesifazane abahle, abafundile nabakwazi ukuzimela, anemiqondo nemibono yawo, kwesinye isikhathi nami ayangibonisa uma sengiphuma endleleni. Ukuthi asesithenjini kakusho ukuthi kawavumelekile ukuzicabangela noma ukuba nemibono,” kusho yena.