UDALULE IMFIHLO OQOPHE UMLANDO
USHIYE phansi abangani abebengazimisele ngokufunda umfundi oqophe umlando ethola umklomelo emnyangweni wezemfundo kuzwelonke, wamela iKwaZulu-Natal ngenxa yemiphumela yakhe emihle kumatikuletsheni.
UMandisa Xaba (18) waseZakheni eMnambithi, maphakathi neKwaZulu-Natal, obefunda eSakhele High School, uthi udele konke ngenxa yokuthi ubekwazi azibekele khona empilweni.
Utshele ILANGA ukuthi ubezibhalele ibhuku lapho ecaze khona isikhathi sosuku nosuku. Uthi njalo uma ephuma esikoleni, ubefika abhekane nezincwadi zakhe.
“Abangani bami bebenezinhlelo zabo nabo kodwa ngenxa yokuthi kakumele ngidlale ngethuba, yingakho ngilisebenzisile ngafunda ngokuzimisela. Njalo ngoMgqibelo bengiya emtapweni wolwazi womphakathi ngihlale kumaxhobelalwazi ( internet) usuku lonke ngiyobheka engingakuqondi kahle, ngibuyele ekhaya sengiyolala.
“Kangizisoli ngesikhathi ebengisichitha ezincwadini zami futhi ngiyafisa ukuthi nabanye abafundi babukele kwesikwenzile nathi,” kusho uMandisa.
“Ezifundweni eziyisi-7 abezenza, uthole o-A kuzona zonke. Ubenza i-English, isiZulu, iPhysics, iMaths, iGeography neLife Orientation. Uyokwenza iziqu zeBachelor of Science kwi-Software Engineering e-University of Cape Town.
Uhlonishwe ngendondo yeFirst Place in Quintile 3 kuzwelonke, wa- phuma kwabali-10 abasebenze kahle KwaZulu-Natal, waklonyeliswa ngendondo yokubaqwaqwada bonke abafundi ngaphansi kukaMasipala wesiFunda uThukela.
Utshele leli phephandaba ukuthi uqoke lezi ziqu ngoba efuna ukwehluka kakhulu endaweni yangakubo ukuze ezokwazi ukuqhamuka nezinto ezintsha ngokusetshenziswa kwekhompyutha.
“Nginxusa abafundi ukuthi ngosuku lokuqala kuvulwe izikole, bafunde kube sengathi unyaka usu-phelile,” kusho uMandisa.
Uthi usewutholile nomfundaze kwaCouncil for Scientific and Industrial Research (CSIR), ozokhokhela zonke izindleko zesikole.