Bagqugquzelwa ukuqala amabhizinisi
Lziboshwa zihalaliselwe yiSilo ngokwenza kahle kumatikuletsheni
KASIBASHIYANGA abasemajele iSilo uZwelithini kaBhekuzulu ngesikhathi sihalalisela abenze kahle kumatikuletsheni wezi-2017 emcimbini obungoLwesihlanu, eNkosi Albert Luthuli International Convention Centre (ICC) eThekwini.
Kulo mcimbi - iSilo sithe imfundo ibaluleke kakhulu kwazise iludondolo lokuphuma ebubheni emindenini eminingi. UMnyango wezeMfundo KwaZuluNatal ubumemezela imiphumela kamatikuletsheni, ubonga nabafundi bakulesi sifundazwe abagile izimanga.
Le miphumela imenyezelwe nguNgqongqushe wezeMfundo KwaZulu-Natal, uMnu Mthandeni Dlungwane ehambisana nondunankulu wakulesi sifundazwe, uMnu Willies Mchunu. ISilo kasikhohlwanga ngabasemajele. Sithe kumele bashintshe impilo yabo, bangalindeli ukuqashwa kodwa baqale amabhizinisi abo.
“Abazali babamba elikhulu iqhaza ezinganeni zabo, kumele bangayeki ukufaka imfundiso. Umatikuletsheni kweminye imizi uwudondolo lokuphuma ebubheni,” kusho iSilo esinxenxe abafundi ukuba baziqalele izinto zabo ezifana namabhizinisi, bangabheki ukuqashwa ngaso sonke isikhathi. “Siyabahalalisela nala- ba abesemajele abenze kahle, okusele manje wukuba baguqule impilo yabo. Yisona sikhathi lesi sokuba bakhethe imfundo ngoba yiyona ebalulekile kakhulu, bangakhohlwa nokuvula amabhizinisi athi bona,” kusho iSilo.
Siveze ukuthi sizohambela izikole nondlunkulu waso waseNyokeni, uNompumelelo Zulu uMaMchiza njengoba enguthishanhloko. Bazonikela ngamalabhorethri ezikoleni ezahlukene ukuqhakambisa imfundo njengesikhali esibalulekile empilweni.
Esinye seziboshwa, uSenzo Fundzo (21) waseMbilo, eThekwini, odonsa iminyaka eyisi-8 eWestville, uthole o-A abane. Uthi uzimisele ngokushintsha impilo yakhe, uyaphuma ngoMandulo (September) nonyaka.
“Uma ngiphuma ngizoqhubeka nemfundo. Ngifunde kakhulu emaphutheni ami, okubalulekile wukuthi ngishintshe impilo yami ukuze ngikwazi ukunakekela umndeni wami obungeseka kukhona konke esengidlule kukhona,” kusho uSenzo. Ezinye iziboshwa ezenze kahle ejele laseWestville kubalwa uSamkelo Mpofana noMorris Gondwe.
Kulo mcimbi lezi ziboshwa beziphelezelwa nguKwandokuhle Ngcobo othole o-A abayisi-6 ngonyaka wezi-2016 khona ejele laseWestville. Abafundi bonke abenze kahle baklonyeliswe ngemiklomele eyahlukene okubalwa ama- laptop nokunye okuzobasiza ukuba baqhubeke nezifundo zabo. Bheka ikhasi 14.