BACHITHA EYAMANZI ANGCOLILE OGWINI
IZINKINGA zamanzi ngaphansi kukaMasipala uGu, eningizimu yeKwaZulu-Natal, sezidale ukuba kusatshalaliswe isithombe esinompompi ophuma amanzi angcolile - okubikwe ukuthi aphuma emzini osePort Shepstone nokho umasipala osichaze njengesingelona iqiniso.
Yize lo masipala uvuma ukuthi izinkinga zamanzi nokuthuthwa kwendle zithanda ukuba ngaphezu kwamandla, uthi ukusatshalaliswa kwalesi sithombe mayelana nesimo samanzi, kudale itwetwe elingenasidingo emalungwini omphakathi futhi kuphazamisa nezinhlelo zabo zokuheha izivakashi ukuze kukhule umnotho wendawo.
Kuvezwa lesi sithombe nje, ihhovisi lomnyango wezasekhaya ePort Shepstone like langasebenza izinsuku ezimbili ngeledlule, amalungu omphakathi abejikiswa engalutholi usizo ngenxa yokungabikhona kwamanzi. Umasipala uthe inkinga idalwe wukubhoboka kwepayipi, agcina elungisiwe amanzi.
Ekhuluma neLANGA uMnu France Zama, okhulumela uMasipala uGu, uthi yinto engafihliwe ukuthi uhlelo lwabo lokushintshwa kwamapayipi kumbe ukufakelwa kwezinsiza zamanzi ezizokwazi ukubhekana nesibalo sabantu abangaphansi kwalo masipala esikhula ngesivinini lu- phazanyiswa wukuqhuma kwamapayipi asemadala kwezinye zezindawo abangakafiki kuzona.
“Izinzisa ebesinazo phambilini bezenzelwe ukubhekana nabahlala emadolobheni kuphela. Ngenxa-ke yokuthi uhulumeni wentando yeningi ufike noshintsho lokuthi abasemalokishini nasezindaweni zasemakhaya kufanele bathole izinsiza ezifanayo nabasemadolobheni, yingakho omasipala abaningi befana nowethu, bebhekene nomthwalo omkhulu wokuqinisekisa ukuthi bonke abantu bathola amanzi ahlanzekile, ukuthuthwa kwendle nezinye izidingongqangi,” kusho uMnu Zama.
Uthi uphenyo lwabo ngesithombe samanzi anodaka luveze ukuthi alusilona iqiniso njengoba nosifakile enkundleni yezokuxhumana ubike imbiba wabika ibuzi ngesikhathi sebemlandelela.
“Noma singabhekana nenkinga enjani yamanzi kodwa ngeke siphakele abantu amanzi angcolile njengoba sisebenzisana noMngeni Water nezinye izinhlaka ukuqinisekisa ukuthi abantu bathola amanzi ahlanzekile,” kusho uMnu Zama.
Uthe izimo lapho kubikwa khona izinkinga bayazilandelela njengoba benezigcawu ezivuleleke kubona bonke abantu ukuba babike izinkinga ababhekana nazo zamanzi.