INJABULO EBAQWAQWADA KWISAYENSI

UBELWELA ukumela iKwaZuluNatal kuzwelonke umfundi ohlonishwe ngoLwesihlanu eNkosi Albert Luthuli International Convention Centre (ICC), eThekwini ngenxa yokubaqwaqwada bonke ozakwabo kulesi sifundazwe kwiSayensi.

Uthole u-100% efunda esikoleni sasemakhaya. UMnyango wezeMfundo KwaZulu-Natal uyaziqhenya ngoSphile Ntuli (17) obefunda eBizimali High school, eNkandla, ngokubeka lesi sifundazwe ebalazweni lezwe ngale mpumelelo yakhe.

Akagcinanga ngokugila izimanga kwiSayensi kodwa ulale endaweni yesithathu ngokwenza kahle ezikoleni ezingaphansi kukaMasipala wesiFunda iKing Cetshwayo, kanti yena uzibona ehlulekile ngoba engabatholanga o-100% kwezinye izifundo.

Lo mfundi ubenza izifundo eziyisi-8 kanti uthole o-A kuzona zonke. Abazali bakhe bathi kabakakholwa namanje ngokuphumelela kwengane yabo ngamalengiso.

UNkk Phumzile Ntuli okungunina, uthi kusukela kuqala unyaka, uyitshelile ingane yakhe ukuthi yiyona ezokwazi ukuzifundisa ngokuphasa kahle ukuze izuze imifundaze. “Ngimtshelile ukuthi kasinawo amandla okumfundisa ngoba baningi kwabo, umthwalo uzosinda kithina.

"Besimkhuthaza ezifisweni zakhe ngoba ubesho ngaso sonke isikhathi ukuthi ufuna ukuphasa kahle,” kusho uNkk Ntuli.

Uthi yena ubenolwazi lokuthi ingane yakhe ifuna ukwenza iziqu zokushayela amabhanoyi nakuba isishintshe umqondo yathi izokwenza ezobudokotela eWits University, eGoli.

USphile uthi namanje kusenzima ukukholwa ukuthi nguyena osebenze kahle KwaZulu-Natal. “Imfihlo yami wukuzimisela bese ngisiza nabanye abafundi," kusho uSphile.

Isikole sakhe iBizimali, silale isine ezikoleni ezili-10 okuphaswe kakhulu kuzona ekubeni zinesibalo esiningi sabafundi.

Lezi zikole yisoGwini High School, iGugulesizwe High School, iSinethezekile Combined Secondary School, iMgezeni High School, iGreenbury Secondary School, yiThongwana High School, iMningi High School, iNkosibomvu High School nePhendukani High School.

ISITHOMBE NGU: THANDEKA NGOBESE BEKUMANAPHANAPHA izolo ngeSonto edolobheni eThekwini njengoba izisebenzi eziyitoho ophikweni lokuthuthwa kukadoti zibeke phansi amathuluzi ngoLwesihlanu zifuna umasipala uziqashe ngokugcwele.

ISITHOMBE NGU: NKOSINGIPHILE DLAMINI USPHILE Ntuli ehalaliselwa nguNgqongqoshe wezeMfundo uMnu Mthandeni Dlungwana, yiNhloko yoMnyango wezeMfundo uDkt Enoch Nzama noNdunankulu waKwaZulu-Natal uMnu Willies Mchunu.