ISILO SIGQUGQUZELA INHLONIPHO KOTHISHA
SIGQUGQUZELE inhlonipho kothisha iSilo samaZulu, uZwelithini kaBhekuzulu - sathi uthisha wayehlonishwa emphakathini ngenxa yokuthi naye ubezihlonipha phakathi kwabantu.
Lokhu sikusho emcimbini wokuklonyeliswa kwabafundi baKwaZulu-Natal abenze kahle kumatikuletsheni obungoLwesihlanu, eNkosi Albert Luthuli International Convenction Centre (ICC), eThe-kwini.
Sithe othisha kumele bazakhele bona ugazi lokuba bahlonishwe njengoba phambilini uthisha ubeyigugu, ehlonishwa yibona bonke abantu.
“Kumele sigcwalise leli gama lenhlonipho elingasekho. Kunabantu nje abamelele ukona into yethu enhle kanti phambilini umzali ubehlonipha uthisha bese nengane yenza njalo. Ungqongqoshe ubehla enyuka kulo nyaka sizwa ngezinto ezimbi ezenzeka ezikoleni nezithinta bona othisha,” kusho iSilo.
Sidonse ngendlebe nabafundi sathi lesi sikhathi kakusesona esokufundela ukuqashwa kodwa ngesokuthi kwenziwe amabhizinisi. Sithi umsebenzi wothisha ubaluleke kakhulu, yingakho kumele babongwe ngabakwenzile.
“Sikhuluma eyokuthi abafundi bakwaZulu-Natal basesicongcweni nje namhlanje, kungenxa yabo othisha abasebenze ngokuzimisela,” kusho iSilo.
Siveze nokuthi akukho lapho singeke sifike khona komasipala bezifunda KwaZulu-Natal, sihamba nongqongqoshe wakhona weze-mfundo, uMnu Mthandeni Dlungwane, sishumayela ivangeli lemfundo, sinxusa othisha ukuba bazikhandle.
Sincome ungqongqoshe sathi usemncane kodwa kukhulu akwenzile.
Sithe ama-72.8 % atholwe wumatikuletsheni kulesi sifundazwe, yinto enkulu kakhulu. “UDlungwane ufike emncane kakhulu emnyangweni kodwa imisebenzi yakhe mihle kakhulu. Ngonyaka ozayo kumele nizibekele okukhulu kunalokhu,” kusho iSilo.
Kuzokhumbuleka ukuthi iSilo sesiseqhulwini kwezemfundo kwaZulu-Natal njengoba nyakenye besisemkhankasweni wokuxoxa nothishanhloko nezigungu ezilawula izikole ngokubaluleka kwemfundo nokuphathwa kwezikole.
Engqungqutheleni yokuqala ebisoNdini, enyakatho yeKwaZulu-Natal, iSilo sikhale ngothisha abadla amambawu bese beya esikoleni baphinde bawadle phambi kwabafundi. Siveze nokuthi kunothishanhloko abahlangana nabathile emakhoneni bese kuqashwana ngendlela engalungile.
Sibhodlele abantu abawufundele lo msebenzi kodwa abangaqashwa ngoba bengakhokhile kwabathile.
Sibuye sabhonga nangokuthi kulo mkhakha sekugcwele othisha abangafikanga ngokobizo kodwa abasebenza ngoba bengawutholi umsebenzi abebewufundele - okuyibona esithi bacekela phansi isithunzi sikathisha.