BAZOQONDISWA IZIGWEGWE OTHISHA ABABAMBELA ABAFUNDI IMIPHUMELA
INHLOKO yoMnyango wezeMfundo KwaZulu-Natal, uDkt Enoch Nzama, ithi kusekhona ingcosana yothisha ebamba imiphumela yabafundi uma belahle izincwadi zesikole nokunye, okuyinto engavumelekile.
Utshele ILANGA ukuthi bonke abafundi kumele balande izitatimende zabo zikamatikuletsheni ezikoleni zabo noma ngabe banezikweletu.
"Kayikho ngisho neyodwa ingane okumele ingasitholi isitatimende ngoba ukukweletana kuphakathi komzali nesikole kakukho okuhlanganisa umfundi nabo othisha kwezezimali. Kumele bakuqonde othishanhloko ukuthi thina njengomnyango sinelungelo lokuqondisa ubugwegwe kuthisha ozophula umthetho esiwubekile.
"Ingane nengane ifunde kanzima unyaka wonke ngakho-ke akufanele iphoxeke ngokubanjelwa isitatimende sayo,” kusho uDkt Nzama.
Uthi kunesekhula kubona bonke othishanhloko, ecacisa kabanzi ngokungavunyelwa kokubanjwa kwezitatimende. Utshele ILANGA ukuthi bangazibambezeli abafundi uma kukhona izinkinga abadibana nazo ezikoleni kodwa kumele babike ngokushesha.
Uthi uma kukhona isikole esizokwenza lokhu, kuzobe kuchaza ukuthi uthisha owenza lokho akasawufuni umsebenzi. “Sesikhathele wukukhuluma into eyodwa, yingakho sesifuna ukwenza isibonelo ngalabo abangafuni ukulalela esibatshela khona. Isikole kumele senze izinhlelo nomzali zokuthi kukhokhelwana kanjani, lokho makungathikamezi ingane.
"Thina siwumnyango sithenga zonke izinto zokufunda nokufundisa. Kuyilungelo lomfundi ukuba afunde ngezimfanelo ezithengwe yithina,” kusho uDkt Nzama. Uthi uma umfundi eyofunda, kusuke kade kunezingxoxo phakathi komzali nesikole, kodwa uma sekunezikweletu bese kuthwala kanzima umfundi.
Utshele ILANGA ukuthi batsheliwe nabahloli ukuthi basukume ngokuphazamisa kweso uma kunezikhalo mayelana nokubanjwa kwemiphumela yabafundi. Unxuse abazali ukuba baxhumane nehhovisi lakhe uma benalezi zinkinga kule nombolo ethi : 033 392 1008 noma ngobhalonyazi ( e-mail) kwethi :kehologile.connie@ kzndoe.gov.za