KUBE MNYAMA KAKHULU, LAPHELA ITHEEMBA SISHIYWA YIMISEBEYELANGA
USHEMBE NOBUNAZARETHA
MHLELI othandekayo, ngivumele ngivume ihubo laseNazaretha elithi “Thokozani wemaNazaretha, siyibonile inkosi yethu.
Imbali ngezinhlobo zayo kayikhanyi kwenjengayo.
Amehlo kaphathelani, ngabe saniphathela. Yinhle kangaka inkosi yethu, wemaZulu wozani”. Leli hubo ngifisa ukulenanela ngencwadi ngokukaJohan 16:16-24 ethi”
“Kusazokuba yisikhashana ningabe nisangibona, kubuye kube yisikhashana ningibone, ngokuba ngiya kubaba.”
Ngakho abanye kubo abafundi bakhe basebekhuluma bodwa, bethi: “Kuyini lokho akushoyo kithi ukuthi: ‘Kusazokuba yisikhashana ningabe nisangibona, kubuye kube yisikhashana ningibone,’ nokuthi: ‘Ngokuba ngiya kuBaba,’ na?”
Bathi: “Kuyini lokho akushoyo ukuthi: ‘Yisikhashana,’ na? Asazi ukuba uthini.”
UJesu wazi ukuthi bebethanda ukumbuza, wathi kubo: “Niyabuzana ngalokho engikushiloyo ukuthi: ‘Kusazokuba yisikhashana ningabe nisangibona kubuye kube yisikhashana ningibone,’ na? Ngiqinisile, ngiqinisile ngithi kini: ‘Niyakukhala nilile nina kepha izwe liyakujabula; niyakuba lusizi nina kepha usizi lwenu luyakuphendulwa lube wukuthokoza.
'Owesifazane nxa esabeletha, ulusizi ngokuba sifikile isikhathi sakhe kepha nxa esembelethile umntwana, akabe esakhumbula ubuhlungu ngenxa yentokozo yokuba kuzelwe umuntu ezweni.
Nani-ke nilusizi manje kepha ngiyakubuye nginibone, inhliziyo yenu ithokoze, intokozo yenu akakho onganamuka yona.
'Ngalolo suku aniyikubuza lutho kimi. Ngiqinisile, ngiqinisile ngithi kini: Lokhu eniyakukucela kubaba egameni lami, uyakuninika khona. Kuze kube kalokhu kanicelanga lutho egameni lami. Celani, niyakwamukeliswa ukuba intokozo yenu igcwale.”
Ngiyafisa okokuqala ukubonga kuNkulunkulu onamandla onke ngokuthi asithwale ngamaphiko akhe sibhekene nolwandle olubomvu siyibona nempi kaFaro ifuna ukusimboza kodwa wangasishiya sodwa wasidabulela amanzi olwandle olubomvu wasiwelisa kwangabhubha namunye wethu.
Sithe siphakathi nehlane wasicishela isibani ebesisikhanyisela kakhulu indlela eya ezweni lesethembiso sesiyizwa emakhaleni (iNkosi Vela “Misebe- yelanga” Shembe). Kubemnyama kakhulu laphela ithemba kwabangakholwayo ukuthi kuyoke kuphinde kukhanye ezweni.
Lesi sihlabelelo engiqale ngaso, sahlasthelelwa nguBhombela isitimela samaMpondo (uMprofethi Isaiah Shembe) ehalalisa ukuthi uNkulunkulu usemnikile ozohola amaNazaretha lapho yena esehambile.
Uthi-ke imbali nezinhlobo zayo kazifani nenkosi yethu.
Uthi Jesu kubafundi bakhe “nina niyakukhala nibelusizi, kepha izwe liyojabula kepha izinyembezi zenu ziyakuphenduka ukuthokoza.
Nangempela la mazwi kaJesu afezekile izwe lajabula ngokuhamba kweNkosi iMisebeyelanga sabalusizi kodwa namuhla izinyembezi zethu seziphenduke intokozo ngoba inkosi kayisishiyanga siyizintandane, isivusele inyama entsha (iNkosi Phinda Shembe).
UJeremiya 33:17 uthi: “Uma nigcina isivumelwano sami akayukwesweleka oyohlala esihlalweni sikaDavide.”
Namanje-ke, uNkulunkulu lowa seKuphakameni ubuye wasikhumbula wasivusela “indlondlo, imamb’ emnyaka kwezikaMayekisa, egibela ngamagatsh’ emith’ ezinye zigibela ngeziqu.
Kuye kwafakaza amakhowe aqhibuke kwelaseNdwedwe ukuthi lukhulu luyeza luyanyelela, iziphindaphinda iyobuthisa phezu kwentaba.”
Ngithi-ke siyabonga kuNkulunkulu ngokuzwa ukulila kwethu wasiphendula ngomusa.
Ngibonge futhi nakubantu bomhlaba abangasiwona amaNazaretha nalabo abasebuNazaretheni abebesimisa ithemba ngemikhuleko, sithi nje, uShembe akafi uyaphila ingunaphakade.
Ukufakaza kwencwadi kaDetoronomi 34: 8; “Abantwana bakwa-Israel bamkhalela uMose emathafeni aKwaMowabi izinsuku ezingama-30, zaphela-ke izinsuku zokukhala ekumlileleni (uMose)”. Abantu bebesola ukuthi kungani kungamenyezalwanga umholi ngelanga okufihlwe ngalo inkosi.
Inkosi ebisihola ibimhlonipha kakhulu uNkulunkulu, ibiwazi umgomo wokuthi ezulwini izingelosi ziyaqoqana zilile uma kuza inceku yeNkosi njengoba nale ncwadi ifakaza ukuthi umuntu oyinceku kaNkulunkulu uyazilelwa.
Nakuba bekungenhloso ukufeza lokhu okushiwo yile ncwadi kodwa uNkulunkulu wenze ngendlela yakhe ukufakazisa ubukhulu benceku yakhe ukuthi inkosi ihambe mhla zingama-23 kuLwezi (November) besekuthi ozolandela amenyezelwe mhla zingama-23 kuZibandlela (December), okuyizinsuku ezingama-30 zokuzila.
UMose-ke wayebaluleke kakhulu embusweni kaNkulunkulu ngoba nguyena okwathi isizwe sikaNkulunkulu sihlushwa yinkosi yesizwe (uFaro), wamthumela ukuba ayosikhipha kulobo bugqili bayo.
Siyezwa-ke ukuthi inkosi lena yayingasabavumeli bakhonze uNkulunkulu wabo, sebekhonza onkulunkulu bayo kodwa yabakhona ingcosana eyasala ilokhu ikhuleke njalo kuNkulunkulu ukuthi angayilibali, ayibuyisele ebukhosini buka-Abraham.
Ngesikhathi uMose ebakhipha, abaningi babemsola bethi le nto ayenzayo uzobaqhatha noFaro ababulale.
Kuyacaca-ke ukuthi ababenovalo lokuphuma basala kwathi ababenesibindi baphuma. Ebunzimeni-ke ababana-bo ehlane, uhambo okwakwethenjwe ukuthi luzoba lufishane, lwagcina selu-yiminyaka eminingi baze baphelelwa yithemba nesineke.
Lokhu-ke kwenza uMose wangabe esafika ezweni ababephikelele kulona. UNkulnkulu kodwa wamazisa uMose ukuba ngaphambi kokuba ahambe emhlabeni, makagcobe uJoshua ozongenisa abantu kulelo lizwe. Joshua 1: 1-3; “Kwathi emuva kokufa kukaMose inceku kaJehova, uJehova wakhuluma kuJoshua indodana kaNuni, isikhonzi sikaMose, wathi:
‘UMose inceku yami ufile, ngalokho suka uwele le Jordan wena nalaba bantu bonke, niye ezweni engibanika lona abantwana bakwa-Israel.
"Zonke izindawo ayakunyathela kuzona amathe onyawo lwenu ngininikile zona, njengalokho ngakhuluma kuMose.” Incwadi yoMshumayeli ithi okwake kwabakhona kuyophinde kubekhona. Siyambonga-ke uNkulunkulu ukuthi kuthi uma kusithela iMisebeye-langa yaphuma iNhlamvuyelanga ukukhanyisela umhlaba. Sithi-ke kuShembe uBhombela isitimela samaMpondo, ukube kwakungewena ngabe safel’ endleleni.
Ngiyabonga inkosi ibusise izwi layo.