Kuqala olunye uhambo kwabaphase umatikuletsheni
SITHATHA leli thuba ukuhalalisela abafundi abaphumelele kumatikulestheni ngonyaka odlule. Leli yigxathu elibalulekile empilweni, elisho ukuqala kwempilo yokuzibambela izinto kwabaningi, bazimele ngokwabo. Kulabo abazoqhubeka nezifundo ezikhungweni eziphakeme zemfundo, sibafisela inhlanhla, sibakhuthaza ukuba bazibambe ziqine ngoba ukufunda enyuvesi kusezingeni eliphezulu kunalelo abalijwayele.
Kulabo abafuna imisebenzi, sibafisela inhlanhla. Kwabangaphumelelanga, siyabanxusa ukuba bangalilahli ithemba kepha bavuke bazithathe, benze imizamo yokuqhuba izifundo ngasese ukuze nabo ngelinye ilanga baphumelele.
Sihalalisela bonke ababambe iqhaza ekwenyuseni imiphumela kamatikuletsheni KwaZulu-Natal ngowezi-2017 emuva konyaka wezi-2016 obe mubi lapho izinhlelo zingahambanga kahle neze.
Sifisa ukuqhakambisa iqhaza lothisha nabaphathi bezikole abebezikhandla, besebenza kanzima amahora amaningi ukuze abafundi baphumelele.
Ezinye zalezi zikole sibhale ngazo ephephandabeni eliyisipesheli lemiphumela eliphume ngoLwesihlanu.
Okugqamayo ngalezi zikole wukuthi othisha bakhona kabahlali be-bheke iwashi, bebheke ukuthi isikole siphuma nini kodwa bashaya umsebenzi ukuze izingane zethu zizuze.
Okuphawulekayo ngezinye zalezi zikole ezenza umsebenzi oncomekayo, wukuthi zisezindaweni zasemakhaya, lapho izimo zokusebenza nezinsiza kungekuhle neze.
Siyathemba ukuthi abangenzanga kahle enyakeni ofile bazobonela kulezi zikole ukuze nabo benze kangcono kulo nyaka.
Mayelana nalezo zikole ezinomlando wokungenzi kahle, siyathemba ukuthi umnyango wezemfundo ngeke ugcine nje ngokuthembisa ukuthatha izinyathelo ezinqala ukulungisa isimo, kodwa uzokwenza njengokwethembisa kwawo.
Yiqiniso elingephikwe ukuthi kunezikole lapho khona kukwamachanca impunz’ edl’ emini, abafundi bazenzela umathanda kanti othisha bayalova, inhlonipho esikoleni yinto engaziwa.
Ezikoleni la kunalesi simo, ubona ngemiphumela emibi unyaka nonyaka.
Sinxusa umnyango wezemfundo ukuba uthathe izinyathelo lapho kunezimo ezibhedayo khona.
Sibuye sinxenxe izinyunyana ukuba zibambisane nezikole, abazali nezikhulu zemfundo ukubuyisa isiko lokufundisa, uzinzo, inhlonipho nokuthula ezikoleni.
Kakulakhi izwe lethu ukuvikela amalungu ezinyunyana angawenzi umsebenzi wawo, kodwa kuyalibulala kanye nekusasa lezingane zethu.
Uma sibheka phambili, noma kuyiqiniso ukuthi kubalulekile ukuphumelela umatikuletsheni kodwa futhi kubalulekile ukuthi uphumelela ngezinga elinjani nokuthi yizifundo ezinjani ezisesitifiketini somfundi.
Kakunambithiseki ukuthi kwamukelekile kuleli lizwe ukuphasa ezinye izifundo ngama-40%. Ngeke sifike ndawo njengezwe uma ama-50% kuya phezulu engathathwa njengezinga lokuphumelela isifundo.
Le ndaba kufanele ilungiswe, singakhohlisani bakwethu. Izibalo neSayensi, ukwenza isibonelo, yizifundo ezibalulekile ukuba umfundi aziqoke uma ehlose ukwandisa amathuba okuthola umsebenzi - uma esephothule izifundo zakhe.
Siyazi sonke ukuthi imisebenzi kayibonwa, ngakho-ke kubalulekile ukuba imizamo kahulumeni kwezemfundo igxile kulezi zifundo ezinganika intsha yethu amathuba amaningi okuthola ukuqeqesheka, ukuzisebenza nomsebenzi ezimbonini.