MASICWILI EZIKWELETINI NGENJABULO YEMIZUZWANA NJE
BAZALWANE, ngiyethemba ukuthi ningene kahle onyakeni omusha, abangangenanga bangambambeli igqubu uNkulunkulu, besekufike isikhathi.
Ake ngihheme njengesidakwa sidlula ngendlela ngasemzini wesalukazi esikweletisa bonke omakhelwane baso ngokuba mnyama futhi sona nobuhle baqhelelene ngo-1 Astronomical Unit (150 000 000km), sizwakala sithi:
“Hheyi wena MaGumede, uloya ngempela, usinda kanjani kumatraffic cop ugijima koWest Street ngale mfene yakho engenayo i- license disc?”
Bazalwane, ngenxa yobugwala bethu, size sikhohlwe ukuthi ukufa njengokuzalawa, kuyinto ebalulekile empilweni. Phela ukube kasifi ngabe siyavelelwa ngoMose besixoxela ukuthi bona ngo-2000BC babhala uSIZIPHOLELE NOJEHOVA - ngesikhathi ebona isihlahla sivutha - “hhayi nina Rev Mkhekhelezi enibhala oSIZIPHOLELE noSIHLE SIKALALA”.
Kangikho-ke ekufeni ngoba abantu bangaze babulawe yingebhe. Bantwana beNkosi, kazikho izidalwa ezinamagangangozi njengathi esimpisholo. Njengoba kade kungamaholide - yize kuwumkhuba esiwujwayele - abantu bebethenga okhilikithi ngezishaqane zezimali koPillay, oKhan no-Owinter bin Laden, abaye bethenga ogologo ababizayo, besho nokusho ukuthi iSmirnoff into kaFebruary kuya kuNovember.
Nakho uMasingana (January) usuqalile, usuhlangana nabo bebakaza sengathi yiselesele elalonile engangifunda ngalo kuMasihambisane Ibanga 3, lo oluhlaza ngaphandle.
Ukucabanga kanjani nje ukuthi uphume impela kini, kwakho noma lapho oqashe khona uyothenga into owaziyo ukuthi uyoyishisela ukuthi iqhume nje ibange umsindo ilimaze izindlebe zezinja zethu nemfene kaMaGumede?
Abantu balokhu bethuka lezi zingane ezizibiza ngezikhothane njengoba ziye zishise imali live, bayakhohlwa ukuthi nabo bayizikhothane ezi- indirect - savelelwa yizikhothane zika- cricket bakithi.
Wukuthi nje bona bathenga lezi ziqhumane ezigcina kwesinye isikhathi sezibalimaza. Kuyimanje izingane kulindeleke zibuyele ezikoleni, inyufomu kayibonwa; izicathulo kuphele unyaka odlule sezi- beyond repair, iyembe ebelimhlophe seligqokwe 3 years laze laphenduka laba wumbala womqombothi.
Umuntu usehamba eboleka izicagogwana zo-R2 ukuze ayothengela ingane i- stationary, ungazi ukuthi ukuphapha lokhu efuna ukubukwa ukuthi ukwazi ukuthenga amabhomu okhilikithi aqhuma kuzamazame umhlaba ubekucabange kanjani - uma amathuluzi okucabanga enawo.
Sengiyayisola le nto yethu ukuthi inoNkulunkulu phakathi, uyazi indlela esenza ngayo izinto ungaze uthi uMdali wethu uyi- federalist njengenyoka, wasidala wasuka lapho wathi umuntu nomuntu makazibonele - kanti kakunjalo, ngicabanga ukuthi yithina esaba ngamahlubuka sashiya owethu uNkulunkulu ngoba sithi akekho civilized njengowontabakayikhonjwa.
Uyazi thina ngisho ukonga yinto esingayazi, ufice umuntu kade esebenza kahle - ngonyaka ehola u-R12 million imali engaba yisitolimende sebhanoyi iBoeing 737 - kuthi kuphela iminyaka eyisihlanu kade kuphume izimali zakhe zasemsebenzini, usuhlangana naye ezinyangeni nakubathakathi ekhala ngokuthi uloyiwe. Uma ubuza ukuthi uloywe ngani, athi:
“Imali yami ephume emsebenzini ivele yanyamalala kuhle kwe- blesser eli- temporal - eliveza ubu- blesser balo ngamaholide kaKhisimusi - ngesikhathi kuqhamuka umashonisa nesagila ezofuna imali yakhe.”
Usho umuntu usekhohliwe ukuthi kube wukuphuma nje kwale mali waqonywa nguBusi, uLucy noCindy abangamqomanga eminyakeni engama-30 edlule, bayibhubhudla imali yakhe sengathi yisikhonyane singenele insimu yombila.
Bakwethu, ake sicabangisise uma sifuna ukuzijabulisa, singasebenzisi izindlela ezizosijabulisa imizuzwana bese sicwila ezikweletini ezizosidalela usizi unyaka wonke.
Masifunde nokonga ukuze phela kuthi noma sifa izingane zethu zingasali zibulawa yindlala bese zilokhu zikhangezwa ngomakhelwane kanti imali ibithi bhutiankela lapha kithi sisaphila.
Abelungu, amaNdiya namaSulumane bayayonga imali thina silibele wukufukula amabhizinisi ezinye izizwe ngento engasisizi ngalutho. Ku-R3 000 owuholayo ungonga u-R50 ongakwenzela umehluko ngokuphela konyaka, hhayi le nto yokonga ngokudlala isitokofela samaqolo ezinkukhu sengathi uyi- carnivore.
Udlala isitokofela sama- braai pack awu-35 kodwa nibane endlini, ne- fridge lakho likwazi ukuthwala ayisihlanu kuphela.
Masongeni imali ngoba yona singakwazi ukuthenga ngayo zonke izinto esizifisayo kodwa ngeke uthenge izicathulo kwaSales House noma kwaBee Gee ngamaqolo ezikhukhu. Hikhensile ngopfu ma-Afrika!
“Imali yami ephume emsebenzini ivele yanyamalala...