ULALE EBALIWE UNGQONDONGQONDO OSHUSHUMBISA IZITHO ZABANTU
UKHALELWE ngamasongo kaSigonyela eCyprus ungqondongqondo wakwa-Israel kwezokushushumbiswa kwezitho zabantu, lokhu kuvewe ngamaphoyisa aseKosovo ngoMgqibelo.
UMoshe Harel usolwa ngokuhlela ukuba kufakelwe izinso kubantu abangaphezu kwe-12 ngendlela engekho emthethweni, okuyinto okuthiwa yenzeke eMedicus Clinic ePrestina - inhlokodolobha yaseKosovo - ngowezi-2008.
“Lo mlisa uboshwe eCyprus ezinsukwini ezimbalwa ezedlule emuva kokuba ePristina kukhishwe incwadi egunyaza ukuthi noma ngabe ubonakala kuliphi ilizwe, kumele aboshwe,” kusho uBaki Kelani okhulumela amaphoyisa aseKosovo.
Sekuphele isikhathi esingangeminyaka eli-10 amaphoyisa ethungatha uHarel ngezinsolo zokuxhaphaza kwakhe izisulu - obekuthathwa kuzona izitho zomzimba - emuva kokuba zilandwe ezindaweni zabadla imbuya ngothi entshonalanga ye-Europe namaphakathi ne-Asia.
Bezihungulwa ngokuthenjiswa u-R222 000 ngezicubu zazo, isisulu ngasinye. Labo “abebenikelelwa ngezitho” - iningi okuyizakhamizi zakwa-Israel - bebekhokha ngaphezulu kuka-R1 481 000. Umkhuba wongqondongqondo kwezokushushumbiswa kwezitho zabantu uqale ukugqama ngowezi-2008 emuva kokuba owesilisa waseTurkey equlekile esikhumulweni sezindiza ePristina - ubekhishwe inso.
Amaphoyisa agasele eMedicus Clinic, egcine ivaliwe emuva kokusabalala kwezindaba mayelana nale mikhuba okusolwa ngayo uHarel. Ngowezi-2013, inkantolo elawulwa yi-European Union (EU), eKosovo, igwebe odokotela abayisihlanu iminyaka esiyi-8 bebhadla ejele ngawo belu umkhuba wokushushumbiswa ngezitho zabantu kuleliya lizwe.
Izisulu okukhishwe izitho zazo zomzimba ngendlela engekho emthethweni, bezinganikwa usizo lwezempilo olufanele, beziphathiswa okwemfucuza nje, ngokusho kwabashushisi ngesikhathi kuthethwa icala.
INkantolo eNkulu yaseKosovo, isesulile isigwebo seminyaka eyisi8 yafuna ukuba icala liqalwe phansi - liyaqhubeka kuyimanje.
“Lo mlisa uboshwe eCyprus ezinsukwini...