Ubehlonishwa ngobugagu bomculo
KWAKUMELE abe yisilomo emculweni kamasikandi uMuhle “Khandosi” Khuzwayo (ongasekho) waseGubazi, eNquthu, ngenxa yobugagu abenabo kodwa wanganikezwa ithuba ngendlela efanele nomsebenzi wakhe kawuzange uphakanyiswe.
Phela bekuyinkukhu nempaka uKhulekani "Mgqumeni" Khumalo, iBhova likaDikadika (ongasekho) nale nsizwa ngoba bezibanga ubugagu okugcine ngokuba kuqenjukelwane phakathi kwathi uMtshengiseni “iNdidane” Gcwensa (ongasekho) waseMsinga, wathatha uhlangothi lukaMuhle njengoba bebebonke emaqenjini kaMahawukela Mseleku (ongasekho).
ILANGA likulandisa kancane ngale nsizwa yakwaKhuzwayo ebiyigagu ngendlela emangalisayo, inephimbo elihle.
Le nsizwa ibizihasha kanjena:
Zisho kuwe wena mathanda ukwenzelwa
Njengale nto yami engihlale ngiyenzela Mihla namalanga Kodwa maqede ingangibongi ngalutho. Umqhoboqhobo webhubesi Kuthokoze zonke izigodi Zithi winkinga bebana. Waqathaka phezulu umfana, Ubebana kumasilingi Zehla izihlathi kuleyo ndawo, Ngiyaphela-ke mina lapho”.
ILANGA lithole ukuthi uMuhle ubezibiza ngomqhoboqhobo webhubesi ngenxa yokuthi ubenesibindi kakhulu, enezigameko ezethusayo. Kuthiwa ngelinye ilanga unikele komunye umuzi eTembisa eGoli isibhamu sisesandleni, eyolanda ingane yakubo. Bebeyizitha nabakulowo muzi.
Bambambile kulowo muzi ekhokhoba nenganono wavale- lwa endlini kwabizwa amaphoyisa kodwa kwabonakala engasekho.
UGIBELE KWI- CEILING EVALELWE ENDLINI
UKhaya Mseleku okungumzala kaMuhle uthi: "Uvalelwe endlini wabonakala engasekho yize bekukhiyiwe emnyango kanti usegibele ku- ceiling board waqathakela kwelinye ikamelo wabaleka. Basale bedumele laba abebethi bayamenzakalisa.
"Yingakho-ke izihasho zakhe zisho kanjena. Ubedubula uMuhle ubengajikeli emuva uma eseqonda ngqo kumuntu. Ubefuze uyise ngesibindi abenaso,” kusho uKhaya. Igama likaMuhle lakwabo nguZamani, uzalwe ngonyaka we-1983. Uzalwa nguMnu Mcabangeleni Khuzwayo noNkz Mkhoso Mseleku.
Uninakhulu wakoninalume wamupha igama likaMuhlengibona, okuyilona leli alisebenzise kwezomculo kodwa aselinqamulelile ethi nguMuhle. Kuthiwa kwalona iBhova belimhlonipha kakhulu uMuhle emculweni ngenxa yobugagu. Le nsizwa kuthiwa ubugagu bayo bubo- nakale isakhula, ka-ngangokuba ngisho isikole isiyeke kwaGrade 3 isithathekile wumculo, ibukela kuninalume (uMahawukela). UMuhle uqale ukufu-nda ukudlala isigingci ngonyaka we-1994 kwathi ngowe-1999 waya eGoli wafikela kuMahawukela esezongena kwezomculo.
UBEGIDELA AMATSHITSHI AMHLOPHE
UMahawukela ulithandile ikhono likaMuhle wamfaka ngaphansi kweqembu Amatshitshi Amhlophe egida kulona. Ngokuhamba kwesikhathi, kuthiwa uMahawukela uthe makusungulwe iqembu leZinsizwa zakwaMseleku ebelizokwenziwa nguyena uMuhle noKhaya Mseleku elikhiphe i-albhamu ethi “Izono” ebinamaphimbo abo bobabili nelesithathu obekungeleBhova.
Ngokuthola kweLANGA uMuhle ukhulume noMahawukela wathi makusondezwe uMgqumeni ngoba uKhaya ubebuye achithe isikhathi esiningi embonini yamatekisi. UMahawukela ushone ngoNhlaba (May) wezi2000 oMuhle bematasa benza leli qembu.
Baqhubekile balikhipha namanye amaqembu kaMahawukela, behlangene nalo iBhova kwabe sekuba nokungaboni ngasolinye phakathi kwabo baze bagudlana nasezingomeni zabo.
Ngowezi-2002, uqalile umsindo omkhulu ngesikhathi sebesungule iqembu elibizwa ngaBafana bakaMahawukela abakhiphe i-albhamu ethi “Sebephelele," obekucula kuyona iBhova kodwa esithombeni bekushuthe uMuhle ngenxa yokuthi iBhova lishiye seliculile estudiyo kwathi uNganeziyamfisa Ntuli (obenguprojusa waseGallo Records) walinikeza uMuhle iqembu ngokusemthethweni.
UMUHLE UKE WASEBENZA NENGODUSO YAKHE
UMuhle uqhubekile wakhipha Amatshitshi Amhlophe ne-albhamu ethi “uFile Umuntu” esebenzisana noWinile Sibiya obekuyingoduso yakhe ngaleso sikhathi. Ngonyaka wezi-2004, uqale ukuzimela wakhipha i-albhamu ethi “Inkunzi Emnyama‚".
Ngowezi-2005 ubuye ngaBafana bakaMahawukela ne-albhamu ethi “Ngenzeni” okuyiyona edume emsakazweni omkhulu, uKhozi FM ngesikhathi umaska- ndi usasakazwa nguKhathide “Tshatha” Ngobe.
UKUXABANA KUKAMUHLE NOMGQUMENI
UKhaya utshele ILANGA ukuthi okuxabanise kakhulu uMgqumeni noMuhle yiwona amaqembu kaMahawukela. “UMgqumeni ubefuna ukuthatha amaqembu kanti noMuhle ubewafuna. Ukuxabana kwabo kwenze ukuthi uMgqumeni azimele, umndeni wathi zonke izinto maziqhutshwe nguMuhle,” kusho uKhaya.
Uthi kwalona iBhova, uMuhle uke walizama ngenganono waze waboshwa ebanjwa nesibhamu elikhokhobela efulethini kanti liyambona lavele labiza amaphoyisa.
Lezi zinsizwa zixabana nje, onina ngabandawonye endlini eyodwa yasoThulini kwaMseleku kanti uMahawukela ubezalwa kwenye indlu yaseNdananeni.
Kuthiwa uMuhle ubezenzela wonke umsebenzi womculo kodwa ubecindezelekile. Ushone mhla ziyisi-9 kuNdasa (March) wezi-2007 emuva kokugula isikhashana.
USHONA NJE UBESEYIQOPHILE YAPHELA I-ALBHAMU
Ungeniswe esibhedlela ngoLwesibili washona ngoLwesihlanu. Bekune-albhamu abeseyiqophile estudiyo ephume engasekho nabesesikhethile isihloko sayo esithi "Imali". Ubeganwe nguMaNtombela omukile ngenxa yokuthi uMuhle ubesegxile kuWinile Sibiya (waMatshitshi Amhlophe).
Kwabo bebebathathu; kunguyena uMuhle, uMnu Zweli Khuzwayo - oshone emuva kukaMuhle - nodadewabo uNkz Galantile Khuzwayo ogane kwaNgema eNquthu.
Endlini yakwabo sekwalenga ukhiye, kakusekho muntu ngoba abazali bashone besebancane.