UBUYELA ERINGINI USIBONISO GONYA
UBUYELA eringini uSiboniso “Tiger” Gonya onomthwalo wokuvikela ibhande leWorld Boxing Organisation (WBO) Intercontinental Bantamweight ingakapheli inyanga kaNdasa (March) kophezulu.
UGonya usebuyele ngokugcwele ejimini njengoba iWBO isibhalele ikhempu yakhe iyinxusa ukuba avikele leli bhande.
UGonya uwuvale kabi unyaka odlule ehlulwa nguZolani Tete obevikela ibhande lo mhlaba leWBO Bantamweight, eNorthern Ireland. UTete uzibeke emlandweni womhlaba ngokuba yibhokisa lokuqala ukuqeda impi inemuzuzwana eyi-11 iqalile. UTete uzovikela ibhande lakhe kuOmar Andres Narvaez wase-Argentina ngenyanga ezayo e-England. UGonya kuthiwa uzokulwa nebhokisa lase-England noma elaseArgentina.
UThulani “Nkunzi” Magudulela weLudonga Boxing Promotions ehlela izimpi zikaGonya uthe sebekudlulisile okwenzeke ngonyaka odlule.
“UGonya usedlulile empini kaTete. Simincele ukuthi uTete ayinqobe le mpi noGonya akwazi ukubuyisa isithunzi.
"UTete usitshele ukuthi ufuna ukunyukela esigabeni seJunior Featherweight.
"Lokhu kuzonikeza uGonya ithuba lokuphinde alwele ibhande lo mhlaba.
"Nokho-ke kubukeka kukuningi okusemqondweni kaTete njengoba efuna nempi yokudidiyela amabhande esuke ihambisana nezindodla zemali.
"Sikubheke ngeso lokhozi konke okwenzekayo.
"Okusijabulisayo wukuthi uGo- nya usahleli endaweni yesithathu ohlwini lwabagaqele ibhande lo mhlaba yize ehluliwe ngonyaka odlule,” kusho uMagudulela.
Uqhube ngokuthi uzohlangana nophromotha waseNamibia kuleli sonto eGoli ukubhunga ngempi kaNkosinathi Biyela okuhlelwa ukuthi ibe kuleliya lizwe. UBiyela bekumele ayokulwa eNamibia ngenyanga edlule kodwa yagcina ibhuntshile impi.