UKWESEKWA KANYE NOBUMBANO
UMHLAHLANDLELA wesizini yoSuthu njengoba luvule unyaka neChippa United izolo ngeSonto ntambama eKing Zwelithini Stadium, eMlazi
NGICELA ukubonga kubo bonke abantu abasijoyinile kulo nyaka njengoba uqala. SingamaZulu FC sithi asithathe leli thuba ngokunifisela unyaka omuhle onezilokotho ezinhle ka-2018.
Kwabaningi basuke bebuyela emsebenzini abawenzayo kanti kunobhutshuzwayo kusuke kumaphakathi nesizini.
Besazi ukuthi le sizini izokuba nzima kwazise sibumbe iqembu ngabadlali abasha.
Kasibanga naso isikhathi sokulungiselela ukuqala isizini kodwa mangikusho ukuthi le sizini ngenye yenzima kakhulu kithina njengekilabhu kwazise amakilabhu amaningi agijima kwiPremiership alikhuphulile izinga lokudlala kulesi sigaba.
Ukusebenza ngokuzikhandla kwabadlali nabaqeqeshi kwenze umsebenzi wethu waba lula, sakwazi ukumelana nobunzima obuphambi kwethu.
Okuhle kakhulu wukuthi ikilabhu ikwazile ukumelana nengcindezi yokudlala esigabeni esikhulu. Mibili kuphela imidlalo engingathi ngiyayivuma induku kuyona, kweminye sibe nebhadi nje. Abadlali benze okungaphezulu kwamandla abo emidlalweni yeligi okungenza ngibe nelikhulu iqholo lokuthi izinto zizoqhubeka kahle ngaphandle kwezihibe.
Abadlali bethu benze kahle ngaphezu kwabamakilabhu athathwa njengamakhulu kwiPSL futhi anomlando obambekayo.
Lokhu kwenze izimbangi zasihlonipha ngokukhulu ukushesha sashintsha ifulegi lokuba ngomakoti. SIYAFISA siyikilabhu ukuthi uma kwenzeka siba nezinkinga kube ngezebhola nje kuphela kungabi nezinto zangaphandle.
Emasontweni amabili adlule kube nemibiko engemihle ngekilabhu engisola ukuthi bekuyimizamo yabathize yokwehlisa isithunzi sekilabhu.
Yingakho nginqume ukuthi ngibize isithangami sabezindaba ngokukhulu ukushesha ngoba ibithinta uSiyabonga Nomvethe ongomunye wabadlali abamqoka eqenjini, onerekhodi elihle ebholeni futhi ofana nomgogodla emndenini woSuthu.
Ngithathe isinqumo sokuba naye abe yingxenye yalesi sithangami ukuze akwazi ukuziphendulela kwabezindaba ngokwenzekile.
Ukuba nomdlali onjengaye kuyinhlanhla futhi kusho lukhulu kithina njengezikhulu zekilabhu.
Kasibhekile ukudlala kwakhe kuphela kodwa sifuna afukule umkhankaso wekilabhu njengoba esefana nobuso bayo ngakho-ke kasisoze sakuvumela ukwehliswa kwesithunzi sakhe kalula.
Uyisibani kubadlali abasakhula. Samlandela ukuzovuselela abadlali abancane abaphelelwa ukuzethemba uma besenkundleni. Ngakho-ke mukhulu umsebenzi awenzayo. Siyalihlonipha kakhulu iqhaza alibambayo ekilabhini futhi usezinhlelweni zekilabhu ukuya phambili.
Ngizwile ukuthi kukhona isigejane sabalandeli esingeneme ngendlela okuqhutshwa ngayo eqenjini kubalwa nokungadlaliswa kukaNomvethe. Okubi wukuthi kweminye yemithombo yabezindaba baze balibeka ngembaba elokuthi uNomvethe uhlela ukuba nomhlangano oyinguyazane nabalandeli ukuze kugxibheke kabi umqeqeshi wethu uCavin Johnson ngoba bezwelana noNomvethe okuyinto esiyigxekayo.
Ngingomunye wabaphathi ka- ngihambisani nalezi zinsolo, uma ziyiqiniso ngeke ngikwazi ukuzamukela kwazise ngithathe isikhathi ngaphambi kokuba ngithathe isinqumo ngalolu daba obelwehlisa isithunzi sekilabhu.
Ngiyazi ukuthi yisigejane nje sabalandeli esingafuni ukulandela imigudu efanele uma kukhona esingeneme ngakho.
Okubi wukuthi lesi sigameko singadala uqhekeko ekilabhini. Kangilindele umlandeli ukuba afike ehhovisi le kilabhu engazange ahlele ngoba lokho kuphazamisa ukusebenza kwekilabhu. Uma kukhona abangakhululekile ngakho, bangaxhumana nosihlalo bamaziko abo noma imenenja yekilabhu uQedi Dlamini noma yinini.
Uma behluleka ukulandela imigomo yekilabhu ngizophoqeleka ukubamisa bangezi emidlalweni yekilabhu okuyinto engeke ingijabulise.
UJohnson nguyena owenza izinqumo ezithinta abadlali, nguye obephela isikimu futhi nguye oshoyo ukuthi kusayina bani.
Empeleni mina noDkt. Patrick Sokhela usihlalo wekilabhu sichitha esiningi isikhathi ekhempini nasemidlalweni ukweseka umqeqeshi nabadlali. Kasingeneleli emsebenzini wabo.
Yingakho wonke umdlali simnika indawo yakhe ngisho uNomvethe ukhona eqenjini nje yingenxa yenhlonipho anayo kumqeqeshi ezikhulwini kanye nakozakwabo. UJohnson nguyena umholi wekilabhu kufanele sikuhloniphe lokho. KUBALULEKILE ukuthi ngalesi sikhathi kube nobumbano kanye nokuthula eqenjini ngoba sinzima isimo esizobhekana naso ukuya phambili. Sonke kufanele sibhekane nokwakha inqanawe yekilabhu ukuze ikhule iye kwelinye izinga. Indlela okubhalwa ngayo ikilabhu kumele abezindaba bakuqikelele ukuthi kayisehlisi isithunzi sayo. Sicela abezindaba babe sesitimeleni esibheke phambili sokufukula le kilabhu iye kwelinye izinga hhayi ukushovela ikilabhu ebumnyameni. Kumele sisebenzisane ngaso sonke isikhathi ngoba sonke siyadingana. Ngiyafisa abezindaba basilekelele kakhulu kungaphinde kwenzeke okufanayo esikhathini esizayo.
* Uma kukhona abafuna ulwazi oluthe thuthu ngekilabhu bangathumela ubhalonyazi kule dilesi ethi:-info@ amazulufc.net
HEBE!!!! HEBE!!!!! USUTHU!!!!!!!!!HEBE!!!!!!!! HEBE!!!!!!!