UYIVUMILE INDUKU UPITSO EDLIWA

UMQEQESHI weMamelodi Sundowns uPitso “Jingles” Mosimane uyivume njengendoda induku ezakhe ziguqiswa ngo-3-2 yiPolokwane City kowe-Absa Premiership ngoMgqibelo ntambama ePeter Mokaba Stadium, ePolokwane.

Amagoli ePolokwane ashaywe ngoSammy Seabi, Walter Musona noRodney Ramagalela, kwathi aweDowns wona ashaywa nguGeorge Lebese no-Oupa Manyisa.

IDowns bekubhekwe iwunqobe lo mdlao kwazise iPolokwane idonsa kanzima ukuthola imiphumela egculisayo.

IPolokwane ishiye abathandi bebhola bebambe ongezansi ibhuquzisa iDowns.

UMosimane uthi iPolokwane ibiwufuna ngaphezu kwabo lo mdlalo.

“Bekufanele sihlulwe kulo mdlalo iPolokwane ibingcono kunathi ikakhulukazi ngesiwombe sesibili.

Nathi-ke siwatholile amathuba ikakhulukazi ngesiwombe sokuqala sangawasebenzisa.

Sivuleke amehlo ngalo mdlalo ngethemba ukuthi sizowalungisa amaphutha,” kusho uMosimane.

UBernard Molekwa ocija iPolokwane uthi abadlali bakhe kuzofanele bangavuvukalelwa ngamakhanda ngoba behlule iSundowns.

“Besazi ukuthi besinganikwa lutho kulo mdlalo yikhona okusifake umfutho.

Kodwa esikwenze kwiSundowns akuganele kusenze sivuvukalelwe ngamakhanda ngoba usemkhulu umsebenzi osisalele.

Asikaphephi ezembeni kufanele siqhubeke nokulwa ngale ndlela esenze ngayo kwiSundowns,” kusho uMolekwa.