Uyabalisa umqeqeshi wePirates
Uzodlala neSundowns eshoda ngabadlali
EZIBUHLUNGU kubalandeli be-Orlando Pirates njengoba izoya emdlalweni omqoka ixhugela yize isanda kubajabulisa.
IPirates iwuvule kahle unyaka inenebula ngo-3-1 iBaroka FC kowe-Absa Premiership ngoMgqibelo ebusuku e-Orlando Stadium, eSoweto.
Amagoli okunqobe ngawo iBucs aqulelwe enethini ngoMusa Nyatama namabili kaLuvuyo Memela, kwathi eleBaroka lona kwaba yiphenathi eshaywe nguMduduzi Mdantsane.
UMilutin “Micho” Sredojevic ocija iBucs ngaphambi kokuba kuvalelwe amaholide kaKhisimusi ukubeke kwacaca ukuthi njengoba esezazi zonke izimbangi zakhe kuzoshuba.
Nokho kubukeka eza kahle njengoba evule unyaka ngembhudlu yamagoli abalobole ngawo iBaroka.
Lo mqeqeshi odabuka eSerbia uthi akagculisekile neze yize ezakhe zinqobile.
Uphinde wazwakalisa ubuhlungu anabo njengoba ezakhe ziyoya emdlalweni weMamelodi Sundowns we-Absa Premiership ozokuba ngoMgqibelo ngo-15h30 eLoftus Stadium, eTshwane ngaphandle kukakaputeni wakhe uThabo Matlaba ozobe edonsa isigwebo samakhadi aphuzi.
UMatlaba uthole ikhadi lesine eliphuzi kulo mdlalo weBaroka.
“Umdlalo siwuqale ngegiya eliphezulu sayiphuthuma iBaroka sashaya amagoli amathathu ngesiwombe sokuqala asheshayo.
"Cishe besiqala ukudlala kanjena selokhu kuqale isizini.
"Ngabe ngiqamba amanga uma ngase ngithi ngijabule ngendlela esidlale ngayo ngesiwombe sesibili besingabonwa.
"Okungiphathe kabi kakhulu wukuthi bese sihluleka nawukuphaselana siphisana kalula ngamabhola.
"Angigculisekanga neze ngicacelwe ukuthi kuningi okusafanele ngikwenze.
"Nokho-ke ngijabule ngomphumela amaphuzu amathathu besiwadinga. Kodwa ngibuhlungu ngokuthi sizoya emdlalweni weSundowns ngaphandle kukakaputeni wethu ozobe edonsa isi-gwebo samakhadi.
"Uma uya emdlalweni onjena udinga bonke abadlali bakho abangumgogodla.
"Kodwa-ke sizobona ukuthi simisa kanjani isikhathi sokuhlela izinto sisenaso,” kusho uSredojevic.
UKgoloko Thobejane ololonga iBaroka uthi akuhambanga ngendlela abehlele ngayo kulo mdlalo.
“Bengihlele ukuthi singayiniki ntuba yokudlala iPirates ngoba iyingozi kodwa sayiyeka yazicanasela.
"Besiwafuna la maphuzu amathathu kwazise siwusonge kahle unyaka kodwa iPirates yala nawo.
Kodwa-ke sizovuka sizosibuyisa isithunzi sethu,” kusho uThobejane.