UMQEQESHI WE-WITS OTAKWINI
ITSHE limi ngothi kumqeqeshi weBidvest Wits njengoba kuvela ukuthi ubizelwe emhlanganweni oyisipesheli.
IWits engompetha be-Absa Premiership iphinde yaphoxa iguqiswa ngo-1-0 yiFree State Stars kowe-Absa Premiership ngoLwesihlanu kusihlwa eBidvest Stadium, eGoli.
Igoli okunqobe ngalo iFree State libhajiswe enethini nguThamsanqa Teyise.
IWits iyona ebambe ibhuleki emsileni we- log.
Kubukeka isazodonsa kanzima njengoba ngoLwesithathu ngo-19h30 izodudulana neSuperSport United koweAbsa Premiership eBidvest Stadium.
Leli phephendaba lithole ukuthi uGavin Hunt ololonga iWits ubizelwe emhlanganweni namuhla ngoMsombuluko emini okuyilapho okuthiwa kufanele achaze khona ukuthi kungani ikilabhu ingenzi kahle.
Kuvela nokuthi uzobe esenikwa nemidlalo emithathu ukuba eguqule isimo sale kilabhu uma kungenjalo ibhantshi lizogcwala umoya.
IWits kuthiwa isiqalile ukuthungatha umqeqeshi ngoba iyabona ukuthi umkhumbi uyazika.
“Inkinga enkulu kwiWits wukuthi uJose Ferreira isikhulu esiphezulu unobudlelwano obukhulu noHunt akakwazi ukumfaka emgqeni.
"Ubudlelwano babo busuka kude besekwiSuperSport United ngakho-ke kunzima ukuthi amqondise ubugwegwe.
"Inkinga ebhekene noFerreira wukuthi amalungu ebhodi leWits afaka ingcindezi kuyena ngoba phela iWits inawo umlando wokugencwa yizembe kulesi sigaba wonke umuntu uthukile.
UFerreira uphoqelekile manje ukuthi ambizele emhlanganweni ukuze alungise isimo kungenjalo amxoshe,” kusho lo mthombo ozazi zonke ezeWits.
UFerreira walile ukuphawula ngalolu daba wathi olwangaphakathi.
Nokho uthi basazowaphendula amatafula.
UHunt uthi uyazi ukuthi uma izinto zingahambi kahle kubhekwa umqeqeshi.
“Akekho umqeqeshi ongabi nalo uvalo ngomsebenzi wakhe uma isimo sinjena.
"Angazi ngempela ukuthi kwenzakalani eqenjini lami ngoba konke sikwenza kahle kodwa imiphumela ivele isiphike.
"Kodwa-ke sizozama ukuphendula amatafula isikhathi sisekhona yize nginovalo ngesimo esikusona,” kusho Hunt.