UNIKWE ITHUBA LESIBILI OBESOLWA NGOKUDLWENGULA

UMDLALI ozakhele udumo egijima kuMaZulu FC oke wasolwa ngecala lokudlwengula uthole ikhaya esayiniswa yiSummerdfield Dynamos elwela ukuvika izembe kwiSouth African Football Association (Safa) KwaZulu-Natal ABC Motsepe League.

ILANGA lithole ukuthi iDynamos isayinise uS’thembiso “Last Number” Dlamini odume ebholeni edlala kuMaZulu FC ngaphambi kokudlulela kwiThanda Royal Zulu osekwaphela ngayo.

UDlamini uke waba semaphepheni esolwa ngokudlwengula intombazanyana ngakubo eClermont, ngaphandle kwancane kwasePinetown.

Kubikwa ukuthi icala ligcine liphelile ngenxa yokungatholakali kobufakazi nommangali engasalubhadi enkantolo.

UMafa “Wele” Zuma ongumsizi womqeqeshi kwiDynamos ukuqinisekisile ukuthi bamsayinisile uDlamini.

Uthi bakubone kumqoka ukuba anikwe elinye ithuba ngoba empilweni kayikho indawo yokulahla umuntu. Uthi ngendlela ayiyo ngathi uzelwe kabusha.

Uveze nokuthi basayinise ngoKhulekani “Fadiga” Ndlela obegijima kwiKwaDukuza United nayo edlala kulesi sigaba.

“Ngiyakholwa ukuthi abadlali abanesipiliyoni yibona esibadinga kakhulu ngoba kunzima manje njengoba sekuvulwe iwindi wonke amaki-labhu azimisele ngokuqinisa. Sihlose kube khona nabanye abadlali esizogadla ngabo ukuze sibe nenqanawe yekilabhu. Ngeke silwele ukunyuka ngale sizini sakha ikilabhu esizogadla ngayo ngesizini ezayo,” kusho uZuma.