Ukhala ngokutatazela kwabadlali
UKomphela uthi lesi yisifo esibi eqenjini lakhe
UMQEQESHI weKaizer Chiefs ukhala ngesifo esilokhu sigadlile eqenjini lakhe. IChiefs ishayane yaze yabukana neSuperSport United kuba ngu-00 kowe-Absa Premiership ngoMgqibelo ntambama eMbombela Stadium, eNelspruit.
IziMpofana bekubhekwe ukuthi ziwunqobe lo mdlalo kwazise zisonge unyaka ngegiya eliphezulu zinqoba imidlalo emibili ilandelana.
Ngaphandle kwalokho ibibhekene neSuperSport engekho efomini njengoba ibisigijime imidlalo emihlanu inganqobi.
Nokho uSiphiwe “Shabba” Tshabalala odlala esiswini kwiChiefs ubeshilo ngaphambi komdlalo ukuthi unovalo njengoba bebesemaholidini kwazise njalo uma bebuya kuwona umgqigqo wabo uyaphazamiseka.
USteve “Mphathi” Komphela ocija iChiefs ukhale ngesifo esibi athi sihlasele eqenjini lakhe.
“Ngiyazi ngizozwakala njengomuntu osejwayele ukucula ingoma eyodwa kodwa injalo nje, ayijiki.
"Sinesifo esibi sokuhluleka wukuphasela inethi sivele sitatazele phambi kwamapali.
"Kulo mdlalo sakhe amathuba amaningi abengenza sinqobe kodwa sangawasebenzisa.
"NeSuperSport ibile nawayo nayo yangawasebenzisa.
"Kodwa-ke nginethemba lokuthi sizosilapha lesi sifo njengoba sisayinise abadlali abaseqophelweni eliphezulu,” kusho uKomphela.
U-Eric Tinkler ololonga iSuperSport uthi ugculisekile ngephuzu alitholile.
“Ngokwami umdlalo bekufanele uphele kanjena sibile nawethu amathuba nabo baba nawabo.
"Bekufanele sicazelane amaphuzu kulo mdlalo alikho ebelifuna ukugoba uphondo.
"Kodwa-ke zikhona izindawana engibonayo ukuthi zidinga ukulungiswa, ngivuleke amehlo ngazo,” kusho uTinkler.
Kulo mdlalo sonke sakhe amathuba...