UFEZE ISETHEMBISO
EZEPOLITIKI: Baxoshise iSilo ngezinkomo
UMENGAMELI omusha weANC , uMnu Cyril Ramaphosa, ufeze isethembiso asenze eSilweni samaZulu, uZwelithini kaBhekuzulu sokuthi uyobuyela kusona emuva kokhetho lweqembu lakhe njengoba ebesivakashele nyakenye. Ulunqobile ukhetho ehlula uDkt Nkosazana DlaminiZuma kwesokuhola leli qembu engqungqutheleni ebimhla zili-16-20 kuZibandlela (December) nyakenye. Izolo ubephelezelwa ngabanye abaholi be-ANC eyokotha iSilo wasihlabisa ngezinkomo eziyivelakancane eNingizimu Afrika zobohlo lwe-Ankole.
WEMUKELWE ngendlamu uMengameli we-African National Congress osanda kuqokwa, uMnu Cyril Ramaphosa, obephelezelwa ngabanye abaholi baleli qembu ngesikhathi evakashele iSilo samaZulu, uZwelithini kaBhekuzulu, esigodlweni saso oSuthu, KwaNongoma, enyakatho yeKwaZulu-Natal izolo ngeSonto.
Ubuholi be-ANC kuzwelonke bebuvakashela iSilo okukuqala ngqa ngemuva kwengqungquthela yokukhetha ubuholi ebiseNazarec, eGoli ngoZibandlela (December) nyakanye, ngenhloso yokuyoziveza kusona, buphinde busazise nangemigomo emisha ethathwe kule ngqungquthela obukhethwe kuyona.
Echaza ngokuhambela kobuholi obuphezulu be-ANC esigodlweni seSilo, okhulumela i-ANC kuzwelonke, uNkk Khusela Sangoni, uthe bekubalulekile ebuholini obusha beANC ukuyokotha iSilo buyozethula njengoba bebuke bavakasha ngaphambi kokhetho lweANC.
“Ukuza lapha eSilweni kusize kakhulu njengoba sikhiphe neziyalo eziqinile sazibhekisa kubaholi abaqokiwe.
"Ngaphandle kokuzethula, umengameli ufezekise isethembiso asenzile eSilweni sokuthi uzobuya esephethe isipho saso sezinkomo ezingajwayelekile zohlobo lweAnkole. "Zintathu izinkomo zalolu hlobo eziphiwe iSilo namhlanje.
"Lezi zinkomo ziyivela kancane eNingizimu Afrika njengoba zifuywe emazweni angaphandle okubalwa kuwona i-Angola kanti eyenkunzi ibiza imali engaphezulu kuka-R750 000 iyodwa,” kusho uNkk Sangoni.
Uthi baye eSilweni ngenxa yokuthi beyi-ANC bayakholelwa ebuholini bomdabu. Uthi i-ANC isungulwe ngokubambisana nabaholi bendabuko.
Phakathi kwabaholi abebekhona kubalwa uMnu David Mabuza (oyisekela likaMnu Ramaphosa), usihlalo we-ANC uMnu Gwede Mantashe, uNobhala-jikelele uMnu Ace Magashule, uMgcinimafa uMnu Paul Mashatile, uNgqongqoshe wezeMali uMnu Malusi Gigaba yiSekela-ngqongqoshe lezaMahlathi nokuDoba, uMnu Bheki Cele noMengameli we-ANC Woman's League (ANCWL), uNkz Bathabile Dlamini.
Bekukhona nobuholi besifundazwe obuchithwe yinkantolo ngonyaka odlule, ubuholwa nguMnu Sihle Zikalala kanti nabaholi abebeseka uMnu Ramaphosa KwaZulu-Natal ngesikhathi ekhankasela isikhudla sokwengameli i-ANC bebekhona - kubalwa kubona uMnu Senzo Mchunu noMnu Mike Mabuyakhulu.
Sikhuluma iSilo sithe sithe sijabulile ukuvakashelwa nguMengameli nethimba lakhe.
Sithe emlandweni kuyaqala ngqa ukuthi umengameli aze azobonga ukunqoba kwakhe selokhu abe sesihlalweni eminyakeni angama-46 edlule. Sibe sesinxusa ubumbano nokusebenzisana phakathi kukahulumeni namakhosi kungabi khona uhlaka oluzobukela phansi olunye.