Uyazethemba kwiDusi Canoe
EZOKUSUBATHA: Ufuna ukuzakhela igama umgwedli wesifazane
MZWAMANDLA ZONDI
UFUNA ukungena emabhukwini omlando kwezokugwedla uNosipho Mthembu (16) ozokube egwedla kwiDusi Canoe Marathon yanonyaka yebanga lika-120km ezoqala mhla zili-15 kwezothwasa isongwe zili-17 isukela eMgungundlovu iphelele eThekwini.
Lo mjaho ngosuku lokuqala uzosukela eMgungundlovu usongwe eNo.9 bridge, eMkhambathini.
Ngosuku lwesibili usuke eNo.9 bridge bame eNanda Dam, bese kuthi ngosuku lwesithathu usuke eNanda Dam ugoqwe eBlue Lagoon, eThekwini.
Umjaho wanonyaka kuzokube kuyi-K2 (abagwedla ngababili). UNosipho wenza uGrade 11 eThokozamnganga High, eShongweni kanti uzokube egwedla noLazola Phangeni. Bazokube beqhudelana kwabaneminyaka yobudala engaphansi kweli-18, ngenxa yokuthi uLazola uneminyaka eli17.
UNosipho utshele ILANGA ukuthi yize bezokube beqala ukungenela lo mjaho kodwa bazimisele ukungena nabokuqala abathathu esigabeni sabo.
“Miningi imijaho engiyenzile ngizilungiselela lona. Izinselelo zayo ngizazi njengoba ngizazi. Ngigijimile kwi-Ozzie Gladwin Canoe Marathon, ngabamba iqhaza kwiMpetha Challenge ngenkulu impumelelo. Ukukwazi ukuqeda le mijaho kunginikeze elikhulu ithemba lokuthi ngizokwenza kahle kwiDusi engizokube ngiqala ukubamba iqhaza kuyo,” kusho uNosipho othi useke wagwedla emzileni weDusi yize engawuqedanga.
Uphethe ngokubonga ukusebenza ngokuzimisela komqeqeshi wakhe uThembinkosi Ngcobo obaqeqesha eShongweni Dam. Uthi kuningi abakufunde kuNgcobo kanti intsha eningi yaseShongweni umdlalo odumile kuwona ukugwedla ngenxa yakhe uNgcobo. IShongweni Dam isikhiqize abagwedli abaningi abahlonishwayo eNingizimu Afrika.
Omunye wabo nguSibonelo Khwela okubhekwe lukhulu kuyena emjahweni wanonyaka njengoba njalo ehlale engena nabokuqala abathathu esigabeni esivulelekile. UKhwela uzokube ebhekwe ngabomvu nakulo nyaka njengoba esanda kuphumela obala ngokuthi ngeke aliphonse ithawula engakawunqobi lo mjaho omkhulukaziwezokugwedla kuleli.